ابوظہبی میں ڈیلیوری موٹر سائیکلوں پر بعض شاہراہوں پر پابندی کا اعلان

یہ ٹریفک حادثات میں کمی اور سڑکوں پر سفر کو مزید محفوظ بنانے کے لیے کیا گیا، یہ پابندی 15 مئی 2026 سے نافذ العمل ہوگی

فیضان ہاشمی جمعہ 8 مئی 2026 16:17

ابوظہبی(اُردو پوائنٹ اخبارتازہ ترین۔ 08 مئی2026ء) ابوظہبی میں ڈیلیوری موٹر سائیکلوں پر بعض شاہراہوں پر پابندی کا اعلان کردیا گیا ابوظہبی انتظامیہ نے ٹریفک حادثات میں کمی اور سڑکوں پر سفر کو مزید محفوظ بنانے کے لیے اہم فیصلہ کرتے ہوئے ڈیلیوری موٹر سائیکلوں کی مخصوص شاہراہوں پر آمدورفت محدود کرنے کا اعلان کر دیا ہے۔ حکام کے مطابق یہ پابندی 15 مئی 2026 سے نافذ العمل ہوگی۔

ابوظہبی کی انٹگریٹڈ ٹرانسپورٹ اتھارٹی کی جانب سے جاری بیان میں کہا گیا ہے کہ یہ اقدام شہر میں بڑھتی ٹریفک، تیز رفتار شاہراہوں پر حادثات کے خدشات اور ڈیلیوری سروسز کی تیزی سے بڑھتی تعداد کو مدنظر رکھتے ہوئے کیا گیا ہے۔ حکام کا کہنا ہے کہ گزشتہ چند برسوں میں آن لائن آرڈرز اور فوڈ ڈیلیوری سروسز میں نمایاں اضافے کے باعث موٹر سائیکلوں کی تعداد بڑھی، جس نے بعض اہم شاہراہوں پر حفاظتی مسائل پیدا کیے۔

(جاری ہے)

اتھارٹی کے مطابق پابندی اُن تمام سڑکوں پر لاگو ہوگی جہاں رفتار کی حد 120 کلومیٹر فی گھنٹہ یا اس سے زیادہ مقرر ہے۔ اس کے علاوہ ’شیخ زید روڈ‘ کا وہ مخصوص حصہ بھی پابندی میں شامل ہوگا جو ’شیخ زید بِرج‘ سے ’شیخ زید ٹنل‘ تک پھیلا ہوا ہے۔ حکام کا کہنا ہے کہ یہ علاقے تیز رفتار ٹریفک کے باعث موٹر سائیکل سواروں کے لیے زیادہ خطرناک سمجھے جاتے ہیں۔

ٹرانسپورٹ حکام نے واضح کیا کہ اس فیصلے کا مقصد ڈیلیوری سروسز کو محدود کرنا نہیں بلکہ انہیں محفوظ بنانا ہے۔ ان کے مطابق تیز رفتار شاہراہوں پر موٹر سائیکلوں اور بھاری یا تیز رفتار گاڑیوں کے درمیان رفتار کا فرق حادثات کا بڑا سبب بنتا ہے۔ اسی لیے ایسے راستوں پر موٹر سائیکلوں کی نقل و حرکت کم کرنے کو ضروری سمجھا گیا۔ بیان میں مزید کہا گیا ہے کہ شہریوں اور ڈیلیوری کمپنیوں کو متبادل راستے فراہم کیے جائیں گے تاکہ خدمات کی فراہمی متاثر نہ ہو۔ متعلقہ ادارے جلد تفصیلی رہنما اصول جاری کریں گے جن میں محفوظ راستوں، متبادل سڑکوں اور نئی ٹریفک ہدایات سے متعلق معلومات شامل ہوں گی۔