پنجاب میں ٹریفک وارڈنز کا نفسیاتی چیک اپ کروانے کا فیصلہ

حکومت نے ماہرین نفسیات کی خدمات حاصل کر لیں، رڈنز کو فرضی صورتحال دے کر ان کے ردعمل کا تجزیہ کیا جائے گا

فیضان ہاشمی جمعہ 8 مئی 2026 15:10

پنجاب میں ٹریفک وارڈنز کا نفسیاتی چیک اپ کروانے کا فیصلہ

لاہور(اُردو پوائنٹ اخبارتازہ ترین۔ 08 مئی2026ء) پنجاب میں ٹریفک وارڈنز کے رویوں کی بہتری کیلئے نفسیاتی چیک اپ کروایا جائے گا۔ اس حوالے سے پنجاب حکومت نے ماہرین نفسیات کی خدمات حاصل کر لی ہیں۔ حکام کے مطابق صوبے میں ٹریفک وارڈنز کے باقاعدہ نفسیاتی چیک اپ کرائے جائیں گے، جن میں ماہرین ان کے رویوں اور ذہنی صحت کا جائزہ لیں گے۔ اس عمل کے دوران وارڈنز کو فرضی صورتحال دے کر ان کے ردعمل کا تجزیہ کیا جائے گا، تاکہ یہ معلوم کیا جا سکے کہ وہ دباؤ کی حالت میں کس حد تک بہتر فیصلہ سازی کر سکتے ہیں۔

حکام کا کہنا ہے کہ اس اقدام کا مقصد ٹریفک نظام میں بہتری اور شہریوں کے ساتھ رویے کو مزید مؤثر اور پیشہ ور بنانا ہے۔ نفسیاتی رپورٹس کی بنیاد پر اصلاحی اقدامات کیے جائیں گے،اس کے علاوہ وارڈنز کے اہل خانہ کے ساتھ تعلقات کا بھی جائزہ لینے کا فیصلہ کیاگیاہے،عوامی دباؤ اور روزمرہ بحث و تکرار کے اثرات کا بھی تجزیہ کیا جائے گا۔

(جاری ہے)

فیلڈ ڈیوٹی کرنے والے اہلکاروں کے شارٹ نفسیاتی ٹیسٹ بھی لیے جائیں گے۔

ادھر وزیراعلیٰ پنجاب مریم نواز شریف نے غیر قانونی کارروائیوں سے عوام کو تنگ کرنے اور پیرا فورس کا نام بدنام کرنے والے اہلکاروں کیخلاف گھیرا تنگ کرنے کا حکم دیا ہے۔ غیر قانونی کارروائی میں ملوث پیرا کے اہلکاروں و افسران کو تین دن کی ڈیٹنشن نہیں تین سال جیل کی ہوا کھانی پڑ سکتی ہے۔ پیرا میں ہر ایک اہلکارکے ریکارڈ کو جانچا جائیگا،جن کا ریکارڈ صاف ہوگا وہ اہلکاربے خوف رہیں لیکن جن کا ریکارڈ صاف نہ ہوا وہ کارروائی کیلئے تیار رہیں۔

وزیر اعلیٰ مریم نواز شریف نے پیرا اہلکاروں پر باڈی کیم نصب کرنے کے لئے 30 جون کی ڈیڈ لائن دے دی۔ وزیر اعلیٰ مریم نواز شریف نے پیرا فورس کے 4 ہزار اہلکاورں و افسران کی سکروٹنی کی ہدایت کی اور پیرا انٹرنل انٹیلی جنس اور وسل بلور سسٹم کو اپ ڈیٹ کرنے کا حکم دیا۔ وزیر اعلیٰ مریم نواز شریف نے پیرا کا نام بدنام کرنے والے عناصر کیخلاف مثالی کارروائی کرنے کابھی حکم دیا۔