تھانہ بارہ کہو میں پاکستان تحریک انصاف کے کارکنان کے خلاف مقدمہ درج

جمعہ 27 مئی 2022 15:10

اسلام آباد(اُردو پوائنٹ اخبارتازہ ترین - این این آئی۔ 27 مئی2022ء) تھانہ بارہ کہو میں پاکستان تحریک انصاف کے کارکنان کے خلاف مقدمہ درج کر دیا گیا ۔مقدمہ پولیس کی مدعیت میں نو نامزد سمیت سو ملزماں کے خلاف درج ہوا، ایف آئی آر کے مطابق ملزمان نے سرکاری گاڑی پر پتھراؤ اور درختوں کو جلایا ،ملزمان نے پولیس نفری پر پتھراؤ اور تشدد کیا، ملزمان نے عمران خان ،خرم نواز،اسد عمر ،شیریں مزاری ،شیخ رشید ،شاہ محمود قریشی کی ایماء پر حملہ کیا ۔

(جاری ہے)

ایف آئی آر کے مطابق زرتاج گل ،سیف اللہ نیازی ،فیصل جاوید ،علی آمین پور گنڈا،پرویز خٹک ،عمران اسماعیل ،شفقت محمود ،عامر کیانی ،علی نواز بھی اشتعال دلوانے والوں میں شامل ہیں ۔ادھر تھانہ کوہسار میں پاکستان تحریک انصاف کے کارکنان کی گاڑی سے اسلحہ برآمد ہوئی ،پولیس نے اپنی مدعیت میں دو نامزد ملزمان کے خلاف مقدمہ درج کر لیا ۔ ایف آئی آر کے مطابق مارگلہ روڈ ناکے پر موجود پولیس نے گاڑی کو روک کر تلاشی لی ، گاڑی سے جدید رائفل اور گولیوں کے میگزین برآمد ہوئے ۔کار سواروں نے بتایا کہ پی ٹی آئی اے کے کارکنان ہیں اور لانگ مارچ میں شرکت کے لیے آئے ہیں ۔