نائب صدر مسلم لیگ(ن )مریم نواز کا تونسہ کے علاقہ ناڑی کا دورہ، سیلاب متا ثرین سے ملاقات

پیر 29 اگست 2022 16:54

تونسہ (اُردو پوائنٹ اخبارتازہ ترین - اے پی پی۔ 29 اگست2022ء) نائب صدر مسلم لیگ(ن )مریم نواز نے پیر کو تونسہ کے علاقہ ناڑی کا دورہ کیا جہاں انہوں نے سیلاب متا ثرین سے ملاقات کے دوران ان کی شکایات سنیں اور ان کے ساتھ اظہار یکجہتی کیا۔ پیر کو انہوں نے مسلم لیگ (ن ) کے قائد نواز شریف کی ہدایت پر سیلاب سے متاثرہ علاقوں کا دورہ کیا ۔

(جاری ہے)

نائب صدر مسلم لیگ (ن) مریم نواز نے تونسہ کے علاقے ٹبی قیصرانی میں سیلاب متا ثرین سے ملاقات کے دوران سیلاب متاثرین سے گفتگو کرتے ہوئے کہا کہ تونسہ سیلاب کی وجہ سےمصیبت میں گھرا ہوا ہے،نواز شریف کی ہدایت پر تونسہ کے سیلاب زدہ علاقوں کا دورہ کر رہی ہوں، قیمتی جانوں کے ضیاع پر دکھ اور افسوس ہے۔

مریم نوازنے کہا کہ یہ سیاست کا نہیں بلکہ عوام کے دکھ میں شامل ہونے کا وقت ہے،مخیر حضرات سے استدعا ہے کہ وہ سیلاب زدگان کی امداد کریں،سیلاب متاثرین کی بحالی کیلئے ہر ممکن اقدامات اٹھائے جائیں گے۔