Live Updates

9 مئی بہانہ تھا، پی ٹی آئی نشانہ ہے

مجھے 9 مئی سے پہلے گرفتار کیا گیا، عمران خان کے خلاف بیان دینے کا کہا گیا، وزیر اعلٰی خیبرپختونخواہ علی امین گنڈاپور کا انکشاف

محمد علی جمعرات 3 جولائی 2025 00:12

اسلام آباد (اُردو پوائنٹ اخبارتازہ ترین۔ 02 جولائی 2025ء) وزیر اعلٰی خیبرپختونخواہ علی امین گنڈاپور نے انکشاف کیا ہے کہ 9 مئی بہانہ تھا، پی ٹی آئی نشانہ ہے، مجھے 9 مئی سے پہلے گرفتار کیا گیا، عمران خان کے خلاف بیان دینے کا کہا گیا۔ تفصیلات کے مطابق وزیر اعلیٰ خیبرپختونخوا علی امین گنڈاپور نے کہا ہے کہ اگر ہماری خیبرپختونخواہ حکومت گرگئی تو میں سیاست چھوڑ دوں گا، آئینی طریقے سے حکومت نہیں گرائی جاسکتی، گورنر راج لگانا ہے تو لگا کر دیکھیں۔

اسلام آباد میں پی ٹی آئی رہنماؤں کے ہمراہ کے نیوزکانفرنس کرتے ہوئے انہوں نے کہا کہ بانی سے بجٹ پر مشاورت کیلئے ملاقات نہ کرانا سازش تھی اور میں اس سازش کو جان چکا تھا، اسی لئے میں نے اسٹینڈ لیا۔ مجھے 9 مئی سے پہلے گرفتار کیا گیا اور عمران خان کے خلاف بیان دلوانے کی کوشش کی گئی۔

(جاری ہے)

ہماری مخصوص نشستیں دوسری جماعتوں کو دے دی گئیں۔

حقوق کیلئے ہماری جدوجہد جاری رہے گی۔ پی ٹی آئی میں دراڑ پیدا کرنا مخالفین کی بھول ہے۔ اگر ہماری خیبرپختونخواہ حکومت گرگئی تو میں سیاست چھوڑ دوں گا، گورنر راج لگانا ہے تو لگا کر دیکھیں، آئینی طریقے سے ہماری حکومت کو نہیں گرایا جاسکتا۔ چیلنج کرتا ہوں کسی میں دم ہے تو میری حکومت گرا کر دکھائے۔ پی ٹی آئی کی خیبرپختونخواہ حکومت گرانے کا اختیار صرف عمران خان کے پاس ہے، بانی جب چاہیں ہمیں حکومت گرانے کا حکم دے دیں۔

مزید برآں وزیراعلی خیبرپختونخوا علی امین گنڈا پور نے پی ٹی آئی پارلیمانی پارٹی اجلاس سے خطاب کرتے ہوئے کہا کہ یہاں کوئی کمپرومائزڈ ہے ،کوئی کسی کے کہنے پر لگا ہوا ہے، صرف نظریے والے ہی پاکستان تحریک انصاف میں رہیں گے۔ علی امین نے کہا کہ پاکستان تحریک انصاف لمبے ریس کے گھوڑے والی پارٹی ہے،صرف نظریئے والے ہی یہاں رہیں گے، جو نظریئے پر کھڑے ہیں انہیں پرواہ نہیں کہ جیل ہو جائے۔

انہوں نے کہا کہ مجھے عمران خان نے صرف نظریہ سکھایا ہے، میرا نظریہ میرا ایمان ہے، یہاں کوئی کمپرومائزڈ ہے اور کوئی کسی کے کہنے پر لگا ہوا ہے۔ انہوں نے کہا کہ میں اپنے ایمان اور نظریے پر قائم ہوں، مجھے کسی کی بات کی کوئی پرواہ نہیں ہونی چاہئے، کسی پر تہمت لگانا بہت بڑا گناہ ہے۔