Live Updates

عوامی رائے پر مبنی سروے، عمران خان نے مقبولیت کے ریکارڈ توڑ دیے

پی ڈی ایم کی تمام قیادت کی مجموعی عوامی حمایت کے مقابلے میں اکیلے عمران خان زیادہ عوامی حمایت حاصل کرنے میں کامیاب ہو گئے

محمد علی جمعہ 7 اکتوبر 2022 23:49

لاہور (اُردو پوائنٹ اخبارتازہ ترین۔ 07 اکتوبر2022ء) عوامی رائے پر مبنی سروے، عمران خان نے مقبولیت کے ریکارڈ توڑ دیے۔ اے آر وائی نیوز کے مطابق آئی آر آئی ایس نامی ادارے کے سروے میں عوام نے اپنی پسندیدہ ترین سیاسی لیڈرشپ کے حوالے سے رائے کا اظہار کر دیا، جس کے مطابق پی ڈی ایم کی تمام قیادت کی مجموعی عوامی حمایت کے مقابلے میں اکیلے عمران خان زیادہ عوامی حمایت حاصل کرنے میں کامیاب ہو گئے۔

پاکستان تحریک انصاف کے سربراہ آئی آر آئی ایس نامی ادارے کے سروے میں 51 فیصد عوام کی حمایت حاصل کرنے میں کامیاب رہے، جبکہ نواز شریف 21 فیصد اور شہباز شریف صرف 10 فیصد عوامی حمایت حاصل کر سکے، جبکہ عوام کی اکثریت نے فوری نئے انتخابات کی حمایت بھی کر دی۔ بتایا گیا ہے کہ سروے کے دوران عوام سے جب سوال کیا گیا کہ اس وقت ملک کا کون سا لیڈر ملک کو مشکلات سے نکال سکتا ہے، تو اس کے جواب میں 51 فیصد عوام نے پاکستان تحریک انصاف کے سربراہ عمران خان کی قیادت پر اعتماد کا اظہار کیا، جبکہ نواز شریف اور وزیر اعظم شہباز شریف مجموعی طور پر 31 فیصد عوامی حمایت حاصل کر سکے۔

(جاری ہے)

سروے کے دوران جب عوام سے سوال کیا گیا کہ قومی اسمبلی کی نشستوں کے ضمنی الیکشن میں کس جماعت کو فتح حاصل ہو گی، تو اس سوال کے جواب میں بھی عوام کی اکثریت نے تحریک انصاف کی حمایت کی۔ جبکہ جب عوام سے پی ڈی ایم کی کارکردگی کے حوالے سے سوال کیا گیا تو 72 فیصد شہریوں نے موجودہ حکومت کی کارکردگی کو بدترین قرار دیا، جبکہ صرف 5 فیصد نے وفاقی حکومت کی کارکردگی پر اطمینان کا اظہار کیا۔ جب عوام سے سوال کیا گیا کہ عام انتخابات کا انعقاد کب ہونا چاہیئے، تو 66 فیصد شہریوں نے فوری عام انتخابات کے انعقاد کی حمایت کی، جبکہ 30 فیصد نے کہا کہ اسمبلی کی مدت مکمل ہونے پر انتخابات ہونے چاہیں۔