جامعہ سندھ میں سپورٹس کوٹہ پر داخلوں کیلئے مختلف کھیلوں کے ٹرائلز 7اور 8فروری کو منعقدہونگے

بدھ 1 فروری 2023 22:27

حیدرآباد (اُردو پوائنٹ اخبارتازہ ترین - اے پی پی۔ 01 فروری2023ء) جامعہ سندھ جامشورو میں تعلیمی سال 2023کیلئے بیچلر ڈگری پروگرامز میں سپورٹس کوٹہ پر داخلوں کیلئے مختلف کھیلوں کے ٹرائلز 7اور 8فروری کو منعقد کرانے کا اعلان کیا گیا ہے ۔

(جاری ہے)

ڈائریکٹر سپورٹس بوائزجامعہ سندھ اجوید احمد بھٹی نے اپنے ایک اعلامیہ میں مطلع کیا ہے کہ ہاکی، بیڈمنٹن، ٹیبل ٹینس، کراٹے، ٹائی کوانڈو، باکسنگ، نیٹ بال ،تھرو بال اور ایتھلیٹکس کے امیدواروں سے ٹرائلز 7فروری کو صبح 10بجے جامعہ سندھ کے حیدر بخش جتوئی پویلین میں لیے جائیں گے نیز باسکٹ بال، والی بال اور چیس کے ٹرائلز بھی 7فروری کو صبح 10بجے فاطمہ جناح گرلز جمنازیم میں منعقد ہونگے ۔

اعلامیہ کے مطابق فٹبال و کرکٹ کے ٹرائلز 8فروری کو صبح 10بجے حیدر بخش جتوئی پویلین اور جامعہ سندھ کے پاکستان کرکٹ بورڈ گرائونڈ میں منعقد ہونگے ۔ڈائریکٹر سپورٹس کے مطابق امیدواروں کی عمر 22 سال سے زیادہ نہیں ہونی چاہئے، وہ ذہنی و جسمانی طور پر مکمل فٹ ہوں، امیدوار سپورٹس کٹ اور جوگرز کے ساتھ بمع قومی شناختی کارڈ مقررہ تاریخ اور ٹائم پر حاضر ہوں۔