اسلام آباد میں مساج سنٹر پر پولیس اور مجسٹریٹ کا چھاپہ غیر قانونی قرار

اسلام آباد کو درہ آدم خیل نہ بنائیں،پولیس نے شفاف تحقیقات نہ کیں تو کیس ایف آئی اے،آئی ایس آئی یا نیب کو دیں گے۔ اسلام آباد ہائیکورٹ کا تمام ذمہ داروں کے خلاف پرچہ درج کرنے کا حکم

مقدس فاروق اعوان پیر 13 مارچ 2023 12:14

اسلام آباد (اردوپوائنٹ،اخبارتازہ ترین ۔ 13 مارچ 2023ء) اسلام آباد ہائیکورٹ نے اسلام آباد میں مساج سنٹر پر پولیس اور مجسٹریٹ کا چھاپہ غیر قانونی قرار دے دیا۔ایکسپریس نیوز کی رپورٹ کے مطابق اسلام آباد ہائیکورٹ کے جسٹس طارق محمود جہانگیری نے مساج سنٹر پر جعلی صحافیوں کے چھاپے اور رقم بٹورنے کے خلاف شہری شاہ فیصل کی مقدمہ اندراج کی درخواست پر سماعت کی۔

اسلام آباد ہائیکورٹ نے پولیس اور انتظامیہ پر شدید برہمی کا اظہار کرتے ہوئے تمام ذمہ داروں کے خلاف پرچہ درج کرنے کا حکم دیا۔جسٹس طارق محمود جہانگیری نے ریمارکس دئیے کہ اسلام آباد کو درہ آدم خیل نہ بنائیں، غیر قانونی چھاپے میں مسجٹریٹ ملوث تھے تو ان کے خلاف بھی کارروائی کی جائے۔پولیس نے شفاف تحقیقات نہ کیں تو کیس ایف آئی اے،آئی ایس آئی یا نیب کو دیں گے۔

(جاری ہے)

ذمہ داروں کے خلاف کارروائی کرکے دس دن میں رپورٹ پیش کریں۔رپورٹ کے مطابق درخواست گزار نے وضاحت کی کہ چھاپہ مار ٹیم کے ہمراہ پولیس یا مجسٹریٹ موجود نہیں تھے۔پرائیویٹ میڈیا پرسنز بن کر چھاپہ مار کر 5 لاکھ 75 ہزار روپے وصول کیے گئے۔واقعے کی شکایت پر پولیس مقدمہ درج نہیں کر رہی۔رقم واپسی کے تقاضے پر واقعے کا مقدمہ درج کر لیا گیا۔عدالت نے کہا کہ فوٹیج کے مطابق پرائیویٹ افراد نے چھاپہ مارا، دروازوں پر دستک دے کر لوگوں کو باہر نکالا اور مار پیٹ کی۔

ان افراد نے وائرلیس تھام رکھے تھے اور کاؤنٹرز سے رقم بھی وصول کی۔عدالت نے ڈی آئی جی آپریشنز کو انکوائری کرکے ذمہ داران کے تعین کا حکم دیا۔خیال رہے کہ گذشتہ سال ایس پی رورل زون حسن جہانگیر وٹو کی ہدایت پراے ایس پی میڈم بینش کی زیر نگرانی ایس ایچ او تھانہ لوہی بھیر چوہدری اخترزمان معہ ٹیم نے دروان کاروائی مختلف مساج سنٹرز پر ریڈ کیے گئے اور مساج سنٹرز کی آڑ میں فحاشی کے مکروہ دھندہ میں ملوث 36 لڑکے اور16 خواتین کوحسب ضابطہ گرفتار کر کے کارروائی کی تھی۔