سعودی عرب نے غیرملکیوں کو ایک اور بڑی سہولت دے دی

غیرملکی باشندوں کیلئے نومولود بچوں کا آن لائن اندراج اور برتھ سرٹیفکیٹ بنوانا ممکن ہوگیا

ساجد علی منگل 21 مارچ 2023 15:49

سعودی عرب نے غیرملکیوں کو ایک اور بڑی سہولت دے دی

ریاض ( اُردو پوائنٹ اخبارتازہ ترین ۔ 21 مارچ 2023ء ) سعودی عرب نے کی جانب سے غیرملکیوں کو ایک اور بڑی سہولت دے دی گئی جس کے تحت مملکت میں مقیم غیرملکی باشندوں کے لیے اپنے نومولود بچوں کا آن لائن اندراج اور برتھ سرٹیفکیٹ بنوانا ممکن ہوگیا۔ سعودی اخبار ’عکاظ‘ نے رپورٹ کیا ہے کہ مملکت میں مقیم غیرملکی اب اپنے بچوں کے برتھ سرٹیفکیٹ آن لائن حاصل کرسکتے ہیں اس کے علاوہ نومولود کا اندراج بھی ابشر کے ذریعے گھر بیٹھے ہی کرایا جاسکتا ہے، نئے طریقہ کار کا ایک بڑا فائدہ یہ بھی ہے کہ اگرکسی کا برتھ سرٹیفکیٹ ضائع ہو جائے اور غیرملکی مملکت سے جا چکا ہو تب بھی اسے اپنے بچوں کے برتھ سرٹیفکیٹ بیرون مملکت حاصل کرنے کی سہولت ہوگی۔

اس حوالے سے سول افیئرڈپارٹمنٹ نے کہا ہے کہ سعودی عرب میں پہلے غیرملکیوں کے لیے ضروری تھا کہ وہ اپنے بچوں کا اندراج ادارے کے دفتر جاکر کروائیں، جس کے لیے انہیں ہسپتال سے ایک لیٹر حاصل کرنا ہوتا تھا جسے ’تبلیغ ولادۃ‘ (پیدائش کی رپورٹ) کہا جاتا ہے، یہ رپورٹ محکمے میں جمع ہوتی جس کے بعد نومولود کا عارضی برتھ سرٹیفکیٹ جاری کیا جاتا تھا اور ویکسین کورس مکمل ہونے پر باقاعدہ برتھ سرٹیفکیٹ جاری کیا جاتا تھا۔

(جاری ہے)

بتایا گیا ہے کہ محکمہ احوال مدنیہ نے وزارت صحت کے تعاون سے اب اس میں کئی تبدیلیاں کی ہیں، پہلی تبدیلی یہ ہے کہ بچے کی پیدائش کی رپورٹ ہسپتال اپنی ویب سائٹ پر جاری کرے گا، اس رپورٹ کی بنیاد پر آن لائن محکمے سے رجوع کرکے برتھ سرٹیفکیٹ حاصل کیا جا سکتا ہے۔