سعودی عرب میں غیرملکی ٹرک ڈرائیوروں پر نئی پابندی عائد

غیرملکی ٹرکوں کیلئے الیکٹرانک ٹرانسپورٹ دستاویز لازمی قرار دے دی گئی

ساجد علی جمعرات 23 مارچ 2023 13:43

ریاض ( اُردو پوائنٹ اخبارتازہ ترین ۔ 23 مارچ 2023ء ) سعودی عرب میں غیرملکی ٹرک ڈرائیوروں پر نئی پابندی عائد کرتے ہوئے غیرملکی ٹرکوں کیلئے الیکٹرانک ٹرانسپورٹ دستاویز لازمی قرار دے دی گئی۔ سعودی عرب کے عکاظ اخبار کے مطابق مملکت کی پبلک ٹرانسپورٹ اتھارٹی نے کہا ہے کہ سعودی عرب آنے والے غیرملکی ٹرکوں کو یکم اپریل سے الیکٹرانک ٹرانسپورٹ دستاویز پیش کرنا ہو گی، اس کے بغیر انہیں مملکت میں داخلے کی اجازت نہیں دی جائے گی، غیرملکی ٹرکوں کو مملکت کے اندر سامان لانے لے جانے کی اجازت نہیں ہے، یہ کام صرف پرمٹ ہولڈرز مقامی شہریوں کے لیے مختص ہے۔

اس پابندی کے حوالے سے کہا گیا ہے کہ اس کے بہت سے مقاصد ہیں، جن میں سے ایک بڑا مقصد سعودی عرب آنے والے غیرملکی ٹرکوں اور گاڑیوں کے ٹرانسپورٹ آپریشن کو منظم کرنا ہے، دوسرا مقصد بری راستے سے کارگو سروس کو زیادہ سے زیادہ محفوظ بنانا ہے جب کہ اس پابندی کا تیسرا بڑا مقصد قومی ٹرانسپورٹرز کو خارجی ٹرانسپورٹرز کی مداخلت سے جائز حدود میں تحفظ فراہم کرنا ہے تاکہ مسابقت کا منصفانہ ماحول قائم کیا جائے۔

(جاری ہے)

اتھارٹی کی جانب سے کہا گیا ہے کہ الیکٹرانک ٹرانسپورٹ دستاویز سامان بھیجنے والے اور وصول کرنے والے سے متعلق بنیادی معلومات پر مشتمل ہوگی، اس میں سامان کی تمام تفصیلات درج کرنا ہوں گی، ٹرک کس تاریخ کو روانہ کیا گیا اور کہاں کہاں سے گزرے گا ان معلومات کو بھی دستاویز میں شامل کرنا لازمی قرار دیا گیا ہے۔