ْصوبائی عام انتخابات میں تاخیر کا معاملہ: تحریک انصاف کی درخواست پر سماعت آئندہ ہفتے ہوگی

اسلام آباد(اُردو پوائنٹ اخبارتازہ ترین - این این آئی۔ 25 مارچ2023ء) سپریم کورٹ آف پاکستان میں تحریک انصاف کی جانب سے پنجاب اور خیبرپختونخوا میں عام انتخابات میں تاخیر کیخلاف دائر درخواست پر اہم پیش رفت سامنے آگئی۔رجسٹرار سپریم کورٹ نے انتخابات کیلئے دائر پی ٹی آئی کی درخواست کو نمبر الاٹ کر دیا۔ درخواست پر کوئی اعتراض عائد نہیں کیا گیا۔

قوی امکان ہے کہ کیس کی سماعت آئندہ ہفتے ہوگی۔اس سے قبل پی ٹی آئی نے الیکشن ملتوی ہونے پر سپریم کورٹ سے رجوع کر لیا تھا۔ پاکستان تحریک انصاف کے سینئر رہنما اسد عمر نے سماجی رابطے کی ویب سائٹ ٹویٹر پر ٹوئٹ کرتے ہوئے بتایا کہ الیکشن کمیشن کے پنجاب اسمبلی الیکشن ملتوی کرنے کے فیصلے کے خلاف سپریم کورٹ میں پٹیشن جمع کروا دی گئی۔

(جاری ہے)

الیکشن کمیشن کے فیصلے کے خلاف اسپیکر پنجاب اسمبلی سبطین خان اور اسپیکر خیبرپختونخوا اسمبلی مشتاق غنی نے مشترکہ آئینی درخواست دائر کی تھی۔

یاد رہے کہ 3تین دن قبل الیکشن کمیشن آف پاکستان نی30اپریل کو پنجاب میں ہونے والے عام انتخابات کو ملتوی کر دیا تھا۔ الیکشن کمیشن کے مطابق اب8اکتوبر 2023 کو الیکشن ہونگے جس کا شیڈول بعد میں جاری کیا جائیگا۔واضح رہے کہ 3 مارچ کو صدر مملکت ڈاکٹر عارف علوی نے پنجاب اسمبلی کے عام انتخابات 30اپریل بروز اتوار کرانے کی تجویز دی تھی۔قبل ازیں3مارچ کو ہی الیکشن کمیشن نی30اپریل سی7مئی کے دوران پنجاب اسمبلی کے عام انتخابات کرانے کے لیے تاریخ تجویز کی تھی، الیکشن کمیشن نے انتخابات ترجیحا اتوار کے روز کرانے کی تجویز بھی دی تھی۔

یہ بات قبل ذکر ہے کہ سپریم کورٹ نے اپنے فیصلے میں کہا تھاکہ پنجاب اور خیبر پختونخوا اسمبلیوں کے انتخابات90روز کی مقررہ مدت میں کرائے جائیں، تاہم عدالت عظمی نے الیکشن کمیشن کو اجازت دی کہ وہ پولنگ کی ایسی تاریخ تجویز کرے جو کہ کسی بھی عملی مشکل کی صورت میں 90روز کی آخری تاریخ سے کم سے کم تاخیر کا شکار ہو۔سپریم کورٹ نے کہا تھا کہ صدر مملکت اور گورنر خیبر پختونخوا الیکشن کمیشن پاکستان کی مشاورت سے بالترتیب پنجاب اور خیبر پختونخوا اسمبلیوں کی تاریخیں طے کریں گے۔