صوابی، تھانہ تورڈھیر کے زخمی کانسٹیبل محمد طیب زخموں کی تاب نہ لا کر شہید ہوگئے، نماز جنازہ میں سینئر پولیس افسران کی شرکت

جمعہ 21 اپریل 2023 22:49

صوابی (اُردو پوائنٹ اخبارتازہ ترین - این این آئی۔ 21 اپریل2023ء) پولیس تھانہ تورڈھیر کے شدید زخمی کانسٹیبل محمد طیب زخموں کی تاب نہ لا کر شہادت کے مرتبے پر فائز ہو گئے۔شہید کی نماز جنازہ پولیس لائنز صوابی میں جمعہ کے روز نماز فجر اور بعد ازاں ان کے آبائی گاؤں شیوہ میں ادا کی گئی،جس میں ڈی پی او صوابی کیپٹن (ر) نجم الحسنین،ایس ڈی پی اوز اور کثیر تعداد میں پولیس آفسران نے شرکت کی۔

ڈی پی او آفس سے جاری پریس ریلیز کے مطابق 09 اپریل 2023 کو ضلع صوابی تھانہ تورڈھیر میں کانسٹیبل محمد طیب فرض کی ادائیگی کے دوران دہشتگردوں کے دستی بم حملے میں شدید زخمی ہوا تھا،زندگی موت کشمکش میں لڑتے ہوئے جمعرات اور جمعے کی درمیانی شب کو پشاور ہسپتال میں زخموں کی تاب نہ لاتے ہوئے شہادت کے اعلیٰ رتبے پر فائز ہوگیا۔

(جاری ہے)

صوابی پولیس لائن میں شہید کانسٹیبل محمد طیب کی نماز جنازہ ادا کرنے کے بعد پولیس کے چاق و چوبند دستے نے سلامی پیش کی اور بعد ازاں اپنے آبائی قبرستان واقع موضع شیوہ میں پورے سرکاری اعزاز کیساتھ سپردِ خاک کر دیا گیا پولیس کے چاق وچوبند دستے نے شہید اہلکار کے قبر کو سلامی اور گارڈ آف آنر پیش کی اس موقع پر ڈی پی او نجم الحسنین نے کہا کہ شہید ہمارا قیمتی اثاثہ ہیں اور ہمیں ان پر فخر ہے، وطن عزیز کی خاطر جان قربان کرنے والے جوانوں کی قربانیاں اور کارنامے ہمیشہ زندہ رہیں گے، شرپسند عناصر کے مذموم عزائم خاک میں ملا کر شہداء کے مشن کو پایہ تکمیل تک پہنچائیں گے۔

ہمیں ملکر اس ملک کی بقا کی جنگ لڑنی ہے اور اپنے پیارے وطن سے جرائم کی بیخ کنی کرنی ہے۔ ہمارے حوصلے بلند ہیں، ایسی لازوال قربانیاں ہم پیش کرتے رہیں گے لیکن وطن عزیز پر آنچ نہیں آنے دیں گے۔پولیس فورس کا ہر جوان آخری سانس تک قیام امن اور جرائم کے خاتمے کے لیے اپنا کردار ادا کرتا رہے گا۔خیبر پختون خواہ پولیس مادر وطن کے اس سپوت کو سلام عقیدت، خراج عقیدت اور خراج تحسین پیش کرتی ہے۔شہید کنسٹبل محمد طیب کا تعلق ضلع صوابی کے تحصیل رزڑ علاقہ شیوہ سے تھا نہایت صوم و صلاة کا پابند اور احسن طریقے سے اپنے فرائض سر انجام دیتے رہیں۔