زندگی بچانے والی ادویات مارکیٹ سے غائب، قیمتوں کے تنازع پر بلیک میں فروخت

اتوار 22 جون 2025 19:50

ملتان (اُردو پوائنٹ اخبارتازہ ترین - اے پی پی۔ 22 جون2025ء) پاکستان کیمسٹ اینڈ ڈرگسٹ ایسوسی ایشن ساؤتھ پنجاب کے صدر محمد اختر بٹ نے انکشاف کیا ہے کہ 146 اہم اور انسانی جان بچانے والی ادویات مارکیٹ سے غائب ہو چکی ہیں جو بلیک میں فروخت کی جا رہی ہیں۔ ان کی قیمتوں میں اضافے کے لیے ڈرگ ریگولیٹری اتھارٹی (DRAP) کی منظوری تاحال نہیں ہوئی۔

(جاری ہے)

اپنے ایک بیان میں اختر بٹ نے ڈریپ کو شدید تنقید کا نشانہ بناتے ہوئے کہا کہ ادویات کی قیمتوں میں ہوشربا اضافے نے عوام کو علاج جیسی بنیادی سہولت سے بھی محروم کر دیا ہے۔

انہوں نے کہا کہ پہلی بار فارما انڈسٹری کو قیمتوں میں من مانے اضافے کی آزادی دی گئی جس کا آغاز پچھلی حکومت نے کیا۔اختر بٹ کے مطابق بے شمار ادویات ایسی ہیں کہ جنہیں غریب اور متوسط طبقہ خرید نہیں سکتا۔انہوں نے مطالبہ کیا کہ 146 ادویات کی قیمتوں میں مناسب اضافہ کر کے انہیں فوری طور پر مارکیٹ میں لایا جائے تاکہ مریضوں کی جان بچائی جا سکے۔ ان کا مزید کہنا تھا کہ فارما کمپنیوں سے تفصیلات طلب کر کے ناجائز منافع خوری پر بھی سخت کارروائی کی جائے۔