ہنگو،کوئلہ کان میں گیس بھرنے کے باعث دم گھٹنے کے نتیجے میں دو بھائیوں سمیت 3کان کن جاں بحق

اتوار 22 جون 2025 20:00

کوہاٹ(اُردو پوائنٹ اخبارتازہ ترین - این این آئی۔ 22 جون2025ء) ضلع ہنگوکے علاقہ طورہ وڑی سے متصل قبائلی ضلع کرم کی حدودمیں واقع کوئلہ کان میں گیس بھرنے کے باعث دم گھٹنے کے نتیجے میں دو بھائیوں سمیت 3کان کن زندگی سے ہاتھ دھوبیٹھے۔تینوں کا تعلق ضلع شانگلہ سے بتایاجاتا ہے۔

(جاری ہے)

ابتدائی اطلاعات اور باخبرسرکاری ذرائع کے مطابق یہ اندوہناک واقعہ اتوار کے روز ضلع ہنگو کے سرحدی علاقہ طورہ وڑی سے متصل قبائلی ضلع کرم کی حدودمیں واقع کوئلہ کان میں مبینہ طورپر زہریلی گیس بھرنے کے باعث پیش آیا جہاں کان میں کام کرنے والے تین مزدور دم گھٹنے کے نتیجے میں جاں بحق ہوگئے۔

جاں بحق افراد میں دو سگے بھائی بھی شامل ہیں۔ذرائع کے مطابق جاں بحق مزدوروں میں دو بھائی محمد ارشاد اور محمدکامل پسران صابر خان اور برکت ولد افسر ساکنان شانگلہ شامل ہیں۔بتایاجاتا ہے کہ واقعہ مبینہ طورپرغیر قانونی مائننگ، انتظامیہ اور کوئلہ کان ٹھیکیدار کی غفلت اور لاپرواہی کے باعث پیش آیا جہاں سیکیورٹی خدشات کی وجہ سے محکمہ معدنیات کے اہلکاروں سمیت انتظامی افسروں کی رسائی قدرے مشکل بتائی جاتی ہے۔