Live Updates

چیئرمین بورڈ آف ڈائریکٹرز انجینئر نوید اسماعیل کا ٹی ایس جی سنٹر لاہور کا دورہ

سٹیٹ آف دی آرٹ ٹریننگ سنٹر کے قیام پر این ٹی ڈی سی مینجمنٹ کو سراہا

منگل 2 مئی 2023 19:15

لاہور (اُردو پوائنٹ اخبارتازہ ترین - این این آئی۔ 02 مئی2023ء) نیشنل ٹرانسمیشن اینڈ ڈسپیچ کمپنی کے بورڈ آف ڈائریکٹرز کے چیئرمین انجینئر نوید اسماعیل نے ٹی ایس جی ٹریننگ سنٹر لاہور سٹیٹ آف دی آرٹ ٹریننگ سنٹر کے قیام پر این ٹی ڈی سی مینجمنٹ کو سراہا ہے۔ یہ اقدام ادارے کی افرادی قوت کی مہارت اورعلم میں اضافے کی جانب ایک اہم قدم ہوگا۔ وہ ٹی ایس جی سنٹر لاہور کے دورہ کے موقع پر اجلاس سے خطاب کر رہے تھے۔

انہوں نے کہا کہ بجلی کی بڑھتی ہوئی طلب کو پورا کرنے کیلئے ہنر مند اور باخبر ملازمین کے تعاون کی ضرورت ہے جو پاور سیکٹر میں نئی ٹیکنالوجیز کو استعمال کرسکیں، اسی وجہ سے اس تربیتی مرکز کو اپ گریڈ کرکے ایڈوانس انسٹی ٹیوٹ آف ایکسیلینس میں تبدیل کرنے کی ضرورت ہے۔

(جاری ہے)

انجینئر نوید اسماعیل نے کہا کہ وہ تربیتی سرگرمیوں کیلئے بجٹ میں اضافے کی حمایت کرتے ہیں اور بورڈ آف ڈائریکٹرز نے پہلے ہی اس مقصد کیلئے بجٹ کو دگنا کرنے کی تجویز دیدی ہے۔

انہوں نے کھیلوں کے میدان میں این ٹی ڈی سی کی الگ شناخت کی اہمیت پر بھی زور دیا اور تجویز دی کی کہ این ٹی ڈی سی کو کھیلوں کی سرگرمیوں میں اپنی الگ شناخت اور اپنا سیٹ اپ قائم کرنا چاہیے۔منیجنگ ڈائریکٹر این ٹی ڈی سی انجینئر ڈاکٹر رانا عبدالجبار خان نے اجلاس کے دوران اظہار خیال کرتے ہوئے جدید ترین ٹی ایس جی ٹریننگ سنٹر کے قیام کی کوششوں پر روشنی ڈالی۔

انہوں نے چیئرمین بورڈ آف ڈائریکٹرز کو اس سلسلے میں گزشتہ دو سال کے دوران ہونے والی پیش رفت سے آگاہ کیا اور چیئرمین بورڈ آف ڈائریکٹرز کے اس نصب العین کے حصول کیلئے کوششیں جاری رکھنے کا عزم ظاہر کیا۔دورے کے دوران چیئرمین بورڈ آف ڈائریکٹرز نے ٹی ایس جی ٹریننگ سنٹر میں مسجد کا سنگ بنیاد رکھا اور ماڈل گرڈ سٹیشن، آپریشن ٹریننگ سمولیٹر روم، پروٹیکشن ریلے روم اور سمولیٹر کلاس روم کا معائنہ کیا۔ انہوں نے انرجائزڈ ٹرانسمیشن لائن پر لائیو لائن واشنگ کی سرگرمیوں کا بھی مشاہدہ کیا۔ ڈپٹی منیجنگ ڈائریکٹر (پی اینڈ ڈی)، کمپنی سیکرٹری، جنرل منیجرز، چیف انجینئرز، چیف فنانشل آفیسر اور دیگر سینئر افسران بھی اس موقع پر موجود تھے۔