گورنرسندھ کامران خان ٹیسوری سے مولانا بشیر فاروقی کی وفد کے ہمراہ ملاقات

ٹرسٹ کے زیر انتظام مختلف منصوبوں ، آئی ٹی کورسز کے نصاب کی تیاری اور دیگر متعلقہ امور پر تبادلہ خیال

پیر 29 مئی 2023 20:30

گورنرسندھ کامران خان ٹیسوری سے مولانا بشیر فاروقی کی وفد کے ہمراہ ملاقات

کراچی (اُردو پوائنٹ اخبارتازہ ترین - این این آئی۔ 29 مئی2023ء) گورنرسندھ کامران خان ٹیسوری سے سیلانی ویلفیئر انٹرنیشنل ٹرسٹ کے سرپرست اعلیٰ مولانابشیر فاروقی نے وفد کے ہمراہ گورنرہائوس میں ملاقات کی ۔ملاقات میں ٹرسٹ کے زیر انتظام مختلف منصوبوں ، نوجوانوں کے لئے آئی ٹی کورسز کے نصاب کی تیاری اور دیگر متعلقہ امور پر تبادلہ خیال کیا گیا جبکہ گورنرز اینی شیٹیو کے تحت نوجوانوں کو آئی ٹی تعلیم کے منصوبے میں تعاون پر بھی بات چیت ہوئی ۔

اس موقع پر گورنرسندھ نے کہا کہ 50ہزار نوجوانوں کو انفارمیشن ٹیکنالوجی کی تعلیم فراہم کریں گے اس ضمن میں انفارمیشن ٹیکنالوجی کورسز کے ضمن میں تیاریاں حوصلہ افزا ہیں ،انشااللہ سیلانی کے تعاون سے اس منصوبہ کے جلد آغاز میں مدد مل رہی ہے۔

(جاری ہے)

انہوں نے کہا کہ کراچی کو آئی ٹی کا مرکز بنانا میرا مشن ہے اس ضمن میںآرٹیفیشل انٹیلی جنس ، میٹاورس اور ویب تھری کے کورسز انتہائی اہم ثابت ہوں گے،آئی ٹی تربیت کے بعد نوجوان ماہانہ تین سے پانچ لاکھ روپے کما نے کے قابل ہوں گے۔

انہوں نے کہا کہ آئی ٹی کورسز کے لئے جلد گورنرہائوس میں ٹیسٹ لئے جائیں گے اور کامیاب نوجوانوں کو آئی ٹی کی مفت تعلیم فراہم کی جائے گی۔ وفد کے اراکین میں آئی ٹی ایکسپرٹس سرضیاء ،دانیال ناگوری ، اور سیلانی ٹرسٹ کے عہدیدارافضل چماڈیا اور ایم غزال شامل تھے۔