ملائیشیا میں روکا گیا پی آئی اے کا طیارہ چند گھنٹوں بعد چھوڑ دیا گیا،

معاملہ سفارتی ذرائع سے حل ہو گیا ہے، جہاز ریلیز ہونے کے بعد کولالمپور سے اسلام آباد پہنچا، ترجمان کی تصدیق

منگل 30 مئی 2023 15:01

کراچی/اسلام آبا د(اُردو پوائنٹ اخبارتازہ ترین - این این آئی۔ 30 مئی2023ء) قومی ایئر لائن پی آئی اے کے طیارے کو ملائیشین حکام نے چند گھنٹوں بعد ریلیز کر دیا۔ذرائع نے بتایا ہے کہ ملائشیا میں گزشتہ روز پی آئی اے کے طیارے کو چند گھنٹوں کے لیے روکا گیا تھا، جس کے بعد اسے چھوڑ دیا گیا۔ذرائع کے مطابق طیارے کو لیز کے مسائل پر کولالمپور میں غیر ملکی کمپنی نے عدالتی احکامات پر روکا تھا۔

ذرائع کے مطابق پی آئی اے کی پرواز پی کے 89 جیسے ہی کولالمپور پہنچی، ملائیشین حکام نے طیارے کو روک لیا تھا۔ترجمان پی آئی اے کے مطابق معاملہ سفارتی ذرائع سے حل ہو گیا ہے، جہاز ریلیز ہونے کے بعد گزشتہ رات گئے کولالمپور سے اسلام آباد پہنچا۔پی آئی اے کے ترجمان کے مطابق بوئنگ 777 طیارہ پی آئی اے کی ملکیت ہے، انجن لیزنگ کمپنی نے ملائیشیا کی ایک عدالت میں غلط اعداد و شمار جمع کروا کے حکمِ امتناع حاصل کیا تھا۔

(جاری ہے)

ترجمان پی آئی اے نے بتایا ہے کہ پی آئی اے نے کولالمپور میں وکلاء کے ذریعے عدالت سے رجوع کر لیا ہے اور معاملہ اس وقت زیرِ سماعت ہے۔پی آئی اے کے ترجمان کے مطابق اس طرح طیارہ رکوانے اور زبردستی پیسے نکلوانے کے معاملات دنیا میں کہیں دیکھنے میں نہیں آئے۔ترجمان پی آئی اے کے مطابق لیزنگ کمپنی اور پی آئی اے دونوں ملائیشیا کی مقامی کمپنیاں نہیں ہیں۔پی آئی اے کے ترجمان نے بتایا کہ پی آئی اے نے اس پرواز کے مسافروں کو متبادل طیارے سے پہلے ہی وطن واپس پہنچا دیا تھا۔ترجمان پی آئی اے کے مطابق کل واجب الادا رقم 1.8 ملین ڈالر تھی جو ادا کی جا چکی تھی۔