Live Updates

بھارت کو گھس کر مارا، شاہینوں نے سالمیت کی حفاظت کی‘عظمی بخاری

ہم نے اپنے شہید بچوں کے نام لکھ کر میزائل ہندوستان میں داغے ہیں بھارت کو لاہور میں ناشتے کا شوق تھا، فضائیہ نے تمام کھانے بھارت میں ہی پہنچا دیئے‘ وزیر اطلاعات

اتوار 11 مئی 2025 15:20

بھارت کو گھس کر مارا، شاہینوں نے سالمیت کی حفاظت کی‘عظمی بخاری

لاہور(اُردو پوائنٹ اخبارتازہ ترین - این این آئی۔ 11 مئی2025ء)وزیر اطلاعات پنجاب عظمی بخاری نے کہا ہے کہ شاہینوں نے پاکستان کی سالمیت کی حفاظت کی، دنیا پاک فضائیہ کو مان گئی اور فرانس کو رافیل کی فکر پڑ گئی،بھارت کو لاہور میں ناشتے کا شوق تھا، فضائیہ نے تمام کھانے بھارت میں ہی پہنچا دیئے۔شاہدرہ میں میڈیا سے گفتگو کرتے ہوئے عظمی بخاری نے کہا کہ پاکستان کا جواب بھارت کبھی بھول نہیں پائے گا، مودی کی پورے خطے پر راج کی خواہش تھی لیکن گھٹنوں پر آنا پڑا، مودی نے جھوٹے پروپیگنڈے چلائے، پاکستانی قوم اورمیڈیا کو سلام ہے، پاکستان نے بھارت کو سوشل میڈیا اور میدان میں شکست دی۔

انہوں نے کہا کہ ہم نے اپنے شہید بچوں کے نام لکھ کر میزائل ہندوستان میں داغے ہیں، بھارتی میڈیا یہ بتا نہیں رہا کہ نقصان کتنا ہوا ہے، ڈی جی آئی ایس پی آر نے کہا تھا ہمارے جواب کی گونج پوری دنیا میں سنائی دے گی، بھارت کو 4دن کی مستی کا جواب صرف 4گھنٹے میں دیا گیا۔

(جاری ہے)

انہوں نے واضح کیا کہ پاکستان نے ہمیشہ کہا ہم پرامن قوم ہیں، جنگ نہیں چاہتے لیکن اس کو کمزوری نہ سمجھا جائے، شریف انسان وقت آنے پر سب سے بڑا بدمعاش ہوتا ہے، پاکستانی قوم بھارتی ڈرونز کو کندھوں پر اٹھا کر نعرے لگارہی تھی، ڈر کر بھاگی نہیں۔

ایک سوال پر انہوںنے کہا کہ افواج ملک کی سالمیت کی جنگ لڑنے کیلئے خود کو ہروقت تیار رکھتی ہیں، دشمن کہہ رہا تھا گھنس کر ماریں گے مگر ان کی ہمت نہیں ہوئی، پاکستانی شاہین ہندوستان میں گئے اورمار کر واپس آئے، ہم نیبھارت کی جنگ کی دھمکی کو جوتی کی نوک پر رکھا تھا۔