دبئی میں ٹیکسی ڈرائیور کی ملازمتیں‘ ماہانہ 5 لاکھ روپے کمانے کا موقع

دبئی ( اُردو پوائنٹ اخبارتازہ ترین ۔ 09 اگست2023ء ) متحدہ عرب امارات میں نئی نوکریاں کھل چکی ہیں اور دبئی میں ٹیکسی ڈرائیوروں اور سپروائزرز کی خدمات حاصل کرنے کے لیے واک ان انٹرویوز کا انعقاد کیا جارہا ہے، جہاں کمپنی 7 ہزار درہم سے زیادہ ( 5 لاکھ پاکستانی روپے سے زائد ) ماہانہ آمدنی کی پیشکش کر رہی ہے۔ خلیج ٹائمز کے مطابق دبئی کی روڈز اینڈ ٹرانسپورٹ اتھارٹی (RTA) کا ایک ذیلی ادارہ دبئی ٹیکسی کارپوریشن (DTC) تمام قومیتوں کے لیموزین ڈرائیوروں، اسکول بس ڈرائیوروں اور بس سپروائزرز/ اٹینڈنٹ کو بھرتی کرنے کے لیے واک ان انٹرویوز کا انعقاد کرے گا، اس دوران 7 ہزار درہم سے زیادہ کی ماہانہ آمدنی کی پیشکش کرتے ہوئے لیموزین ڈرائیور بھی بھرتی کیے جائیں گے، اس ملازمت کے لیے اپلائی کرنے والے درخواست دہندگان کے لیے 2 سال کا تجربہ اور آبائی ملک، یو اے ای یا جی سی سی کا ڈرائیونگ لائسنس ہونا ضروری ہے۔

(جاری ہے)

بتایا گیا ہے کہ اسکول بس ڈرائیور کے عہدوں کے لیے درخواست دینے والے امیدواروں کو 2 ہزار 700 درہم تنخواہ کی دی جائے گی اور ان کی عمر 23 سے 45 سال کے درمیان ہونی چاہیئے، اس ملازمت کے حصول کیلئے متحدہ عرب امارات کا ڈرائیونگ لائسنس ( ہیوی وہیکل نمبر 6) ضروری ہے جب کہ بس سپروائزرز / اٹینڈنٹ کے کردار کے لیے دبئی ٹیکسی 23 سے 45 سال عمر کی خواتین کو بھرتی کر رہی ہے، جس کے لیے منتخب امیدواروں کو 1,500 سے 1,800 درہم ماہانہ تنخواہ کے علاوہ دیگر فوائد کی بھی آفر کی جائے گی۔

معلوم ہوا ہے کہ اپریل میں دبئی ٹیکسی نے 10 ڈرائیوروں کو اعزاز سے نوازا جنہوں نے 2022ء میں 'DTC ایپ' کے ذریعے سب سے زیادہ ٹرپس حاصل کیے، یہ اقدام DTC کی ڈرائیوروں کی ملازمتوں میں بہترین کارکردگی دکھانے کی حوصلہ افزائی کرنے کی کوششوں کا حصہ ہے۔ اس کے علاوہ کمپنی نے اپنی اسکول بس ایپلی کیشن (DTC School Bus App) میں 20 ہزار سے زیادہ طلباء سمیت 58 سرکاری اسکولوں کا انضمام بھی شروع کیا، یہ اقدام ڈی ٹی سی کے پورے امارات میں سرکاری اسکولوں تک اپنی خدمات کو وسعت دینے کے منصوبے کا ایک حصہ ہے، فی الحال ڈی ٹی سی کی اسکول بسیں تقریباً 800 راستوں پر نقل و حمل کی خدمات فراہم کرتی ہیں۔

کمپنی کی جانب سے کہا گیا ہے کہ ڈرائیورز اور سپروائزرز کی نوکریوں کے لیے واک اِن انٹرویوز 11 اگست بروز جمعہ صبح 7 بجے سے 11 بجے تک پرائیولج لیبر ریکروٹمنٹ آفس M-11، ابو ہیل سینٹر میں ہوں گے۔