مجھے کچھ نہیں ہوگا زہر پینے کی اجازت دی جائے، شہری کی لاہور ہائیکورٹ میں انوکھی درخواست

لاہورہائیکورٹ نے درخواست کے ناقابل سماعت قرار دیکر مسترد کر دی

منگل 12 ستمبر 2023 22:54

لاہور (اُردو پوائنٹ اخبارتازہ ترین - آن لائن۔ 12 ستمبر2023ء) مجھے کچھ نہیں ہوگا زہر پینے کی اجازت دی جائے، شہری کی لاہور ہائیکورٹ میں انوکھی درخواست، لاہور ہائیکورٹ نے درخواست کے ناقابل سماعت قرار دیکر مسترد کر دی۔ تفصیلات کے مطابق لاہور کے علاقے مزنگ کے رہائشی سرور تاج نے لاہور ہائیکورٹ میں انوکھی درخواست دائر کی کہ قرآنی آیات پڑھ کی موچی گیٹ پر زہر پینے کا مظاہرہ کرنا چاہتا ہوں اور مجھے کچھ نہیں ہوگا لہٰذا عدالت مجھے یہ تجربہ کرنے کی اجازت دے۔

دوران سماعت جسٹس راحیل کامران نے استفسار کیا کہ آپ زہر کیوں پینا چاہتے ہیں شہری نے عدالت کو بتایا کہ میرے پاس علم ہے میں زہر پیوں گا مجھے کچھ نہیں ہوگا۔ عدالت نے ریمارکس دیئے کہ خودکشی تو حرام ہے اور عدالت حرام کام کی کیسے اجازت دے سکتی ہے، آپ سستی شہرت کیلئے کوئی سٹنٹ کھیل رہے ہیں۔

(جاری ہے)

شہری نے موقف اختیار کیا کہ مجھے کوئی شہرت نہیں چاہئے، میرا اللہ پر یقین ہے مجھے کچھ نہیں ہوگا عدالت اجازت دیدے۔

عدالت نے ریمارکس دیئے کہ بھارت میں کینسر کے مریضوں نے موت آسان کرنے کیلئے سپریم کورٹ سے رجوع کیا تھا، خود موت مانگنے والوں کے حوالے سے بھارتی سپریم کورٹ کے فیصلے موجود ہیں۔ عدالت نے ریمارکس دیئے کہ ہم کسی غیر قانونی کام کی اجازت نہیں دے سکتے آپ کا اگر زیادہ دل ہے تو کریں، پھر قانون کے مطابق آپکے خلاف جو کارروائی ہوگی وہ ہوجائے گی۔ عدالت نے درخواست ناقابل سماعت قرار دیکر مسترد کر دی