سپریم کورٹ نے دہشتگردی میں ملوث دو ملزمان کی سزا کے خلاف اپیلیں مسترد کر دیں

اسلام آباد (اُردو پوائنٹ اخبارتازہ ترین - این این آئی۔ 21 ستمبر2023ء) سپریم کورٹ نے دہشتگردی میں ملوث دو ملزمان کی سزا کے خلاف اپیلیں مسترد کر دیں ۔ جمعرات کو سپریم کورٹ نے ہائیکورٹ کا عمر قید کا فیصلہ برقرار رکھتے ہوئے اپیلیں مسترد کیں،14 صفحات پر مشتمل فیصلہ جسٹس مظاہر نقوی نے تحریر کیا۔ فیصلے میں کہاگیاکہ ہمارے ملک کا شمار دنیا کے ان ممالک میں ہوتا ہے جو دہشتگردی کا سب سے زیادہ شکار رہے، نوے کی دہائی میں انتہا پسندی کی بنیاد پر دہشتگردی ہوئی، وقت کے ساتھ دہشتگردانہ کارروائیوں میں مزید اضافہ ہوا۔

فیصلہ کے مطابق اب دہشتگردی کا نشانہ اہم عہدوں پر فائز شخصیات اور قانون نافذ کرنے والے ادارے ہیں۔ فیصلے میں کہاگیاکہ دھماکہ خیز مواد، آتشیں اسلحہ، ٹارگٹ کلنگ، اغواء برائے تاوان اور دہشتگردی کے ذریعے فنڈز اکٹھے کیے جا رہے ہیں، ان تمام سرگرمیوں کا مقصد معاشرے کا امن تباہ کرنا اور خوف و ہراس پھیلانا ہے۔

(جاری ہے)

فیصلے میں کہاگیاکہ دہشتگردی کی بڑھتی سرگرمیوں سے قومی معیشت کو اربوں ڈالر کا نقصان ہوا، ریاست کو دہشتگردوں سے محفوظ رکھنے اور اپنی عملداری برقرار رکھنے کے لیے غیر معمولی اقدامات کی ضرورت ہے۔

فیصلے میں کہاگیاکہ ریاست ادارے اس بات پر متفق ہیں کہ قانون توڑنے والوں سے آہنی ہاتھوں سے نمٹا جائے، اسی مقصد کے لیے انسدادِ دہشتگردی قانون متعارف کرایا گیا، ہر گزرتے دن کے ساتھ جرائم کی شرح میں اضافہ ہو رہا ہے۔ فیصلے میں کہاگیاکہ قانون کو توڑ کر معاشرے کا امن تباہ کرنے والوں سے آہنی ہاتھوں سے نمٹنا ضروری ہے، معاشرے کا امن تباہ کتنے والے مجرم کسی نرمی کے حقدار نہیں۔ملزمان نے ڈیرہ غازی خان میں پولیس ناکے پر دو اہلکاروں کو قتل کیا تھا،ٹرائل کورٹ نے ملزمان کو سزائے موت سنائی تھی،لاہور ہائیکورٹ نے سزائے موت کو عمر قید میں تبدیل کیا تھا،ملزمان نے ہائیکورٹ کے فیصلے کے خلاف سپریم کورٹ میں اپیل دائر کی تھی۔