ملک میں منتخب جمہوری حکومت کیخلاف بند کمروں میں کی گئی سازش اوراس میں ملوث کرداروں کی حقیقت ہرزاویے سے قوم کے سامنے عیاں ہوچکی ہے ، تحریک انصاف

جمعہ 22 ستمبر 2023 22:01

اسلام آباد (اُردو پوائنٹ اخبارتازہ ترین - آن لائن۔ 22 ستمبر2023ء) پاکستان تحریک انصاف نے مسلم لیگ (ن) کے رہنما رانا ثناء اللہ کے سابق آرمی چیف کی مدت ملازمت میں توسیع اور تحریک انصاف کی منتخب حکومت کیخلاف سازش کے حوالے سے بیان کو رجیم چینج سازش کے مکرو ہ مقاصد اور اس میں ملوث کرداروں کے گھنائونے پن کے حوالے سے چیئرمین پی ٹی آئی کے موقف کی تائید و توثیق قرار دے دیا ہے ۔

ترجمان تحریک انصاف کے مطابق ملک میں منتخب جمہوری حکومت کیخلاف بند کمروں میں کی گئی سازش اور اس میں ملوث کرداروں کی حقیقت ہر زاویے سے قوم کے سامنے عیاں ہوچکی ہے جمہوریت اور عوام کے مینڈیٹ پر ڈالے جانے والے ڈاکے کی پوری تفصیلات خود سازش میں ملوث کردار کھول کھول کر قوم کے سامنے رکھ رہے ہیں پی ڈی ایم حکومت کا وزیرِدفاع برملا اعتراف کرچکا ہے کہ غیر جمہوری و غیرسیاسی عناصر ابتدائ ہی سے تحریک انصاف کی حکومت کیخلاف سازشوں میں مصروف تھے۔

(جاری ہے)

ترجمان کا کہنا تھا کہ ’’دی انٹرسیپٹ‘‘ نے امریکہ میں پاکستانی سفیر کے بھجوائے گئے خفیہ مراسلے کا متن چھاپ کر رجیم چینج سازش میں کارفرما عوامل دنیا پر آشکار کئے سابق وزیراعظم کے پرزور اصرار کے باوجود اس خفیہ مراسلے کی روشنی میں سازش کی اعلیٰ سطحی عدالتی تحقیقات سے اجتناب کرکے سازشیوں اور سہولتکاروں کو بچانے کی کوشش کی گئی۔ریاست اپنے ذمے قوم کا قرض ادا کرے اور دستور، جمہوریت، عوام کے مینڈیٹ اور معیشت و سیاست کو ذبح کرکے ملک کو بدترین بحرانوں کے سپرد کرنے والوں کے محاسبے کا اہتمام کرے۔