پہلی مرتبہ ٹی ٹوئنٹی انٹرنیشنل میچ کی ایک اننگ میں 300 سے زائد رنز بنا دیے گئے

بین الاقوامی ٹی ٹوئنٹی کرکٹ کی 18 سالہ تاریخ میں آج تک کوئی بھی ٹیم ایک اننگ میں ٹرپل سینچری اسکور نہ کر سکی تھی

محمد علی بدھ 27 ستمبر 2023 19:08

لاہور (اردو پوائنٹ تازہ ترین اخبار ۔ 27 ستمبر 2023ء ) پہلی مرتبہ ٹی ٹوئنٹی انٹرنیشنل میچ کی ایک اننگ میں 300 سے زائد رنز بنا دیے گئے، بین الاقوامی ٹی ٹوئنٹی کرکٹ کی 18 سالہ تاریخ میں آج تک کوئی بھی ٹیم ایک اننگ میں ٹرپل سینچری اسکور نہ کر سکی تھی۔ تفصیلات کے مطابق نیپال کی ٹیم ٹی ٹونٹی کرکٹ کی تاریخ میں 300 سے زیادہ رنز بنانے والی پہلی ٹیم بن گئی۔

نیپال نے انہوں نے ہانگزو میں ایشین گیمز میں منگولیا کیخلاف اپنے 20 اوورز میں 3 وکٹوں پر 314 رنز سکور کیے، اس سے قبل افغانستان نے 2019ء میں آئرلینڈ کے خلاف 278 رنز بنائے تھے۔ تیسرے نمبر پر بیٹنگ کرنے والے کشال مالا نے 34 گیندوں پر تیز ترین ٹی ٹونٹی انٹرنیشنل سنچری بنا کر اپنی ٹیم کی راہنمائی کی۔ مالا نے 2017ء میں بنگلہ دیش کے خلاف 35 گیندوں میں جنوبی افریقہ کے ڈیوڈ ملر کی سنچری کا ریکارڈ توڑا اور صرف 50 گیندوں پر ناٹ آؤٹ 137 رنز بنائے۔

(جاری ہے)

انہوں نے 12 چھکے اور آٹھ چوکے لگائے۔ نیپال کے بلے باز ژیجیانگ یونیورسٹی فار ٹیکنالوجی پنگفینگ کرکٹ فیلڈ میں دھواں دھار بیٹنگ کرتے نظر آئے، کپتان روہت پاوڈل نے 27 گیندوں پر چھ چھکوں کی مدد سے 61 رنز بنائے۔ دیپندر سنگھ ایری نے 9 گیندوں پر ناقابل شکست 52 رنز میں 8 چھکے لگائے۔ انہوں نے تیز ترین نصف سنچری کا ریکارڈ تاقیامت اپنے نام کرلیا، اس سے قبل انگلینڈ کے خلاف ہندوستان کے یوراج سنگھ نے 2007ء میں 12 گیندوں پر نصف سنچری سکور کی تھی ۔

نیپال کی اننگز میں 26 چھکے لگانا بھی ایک ریکارڈ تھا، افغانستان نے آئرلینڈ کے خلاف 22 چھکے مارے تھے۔ منگولیا، جس کی خواتین ٹیم گزشتہ ہفتے ایشین گیمز میں صرف 15 رنز پر ڈھیر ہو گئی تھی، صرف 41 رنز بنا کر آؤٹ ہو گئی۔ نیپال کا 273 رنز کے مارجن سے جیتنا کسی T20 انٹرنیشنل میں رنز کے لحاظ سے اب تک کا سب سے بڑا مارجن تھا۔ اس سے قبل 2019ء میں جمہوریہ چیک نے ترکیہ کے خلاف 257 رنز کے مارجن سے کامیابی حاصل کی تھی۔