پاکستان کا مستقبل بہت روشن ہے ہم سب نے اپنا حصہ ڈال کر اس ملک کو آگے لے جانا ہے، محسن نقوی

لاہور (اُردو پوائنٹ اخبارتازہ ترین - اے پی پی۔ 29 ستمبر2023ء) نگران وزیراعلی پنجاب محسن نقوی نے کہا ہے کہ موجودہ وسائل میں رہتے ہوئے اساتذہ اپنا کردار ادا کریں اور طلبہ کو اچھی تعلیم دیں تو یہ معاشرہ بہتر ہوجائیگا، پاکستان کا مستقبل بہت روشن ہے اوراس نے بہت آگے جانا ہے،ہم سب نے اپنا حصہ ڈال کر اس ملک کو آگے لے جانا ہے،وہ ڈسٹرکٹ ایجوکیشن اتھارٹی لاہور کے زیراہتمام الحمرا ہال میں عید میلاد النبیﷺ کے سلسلے میں مقابلہ نعت خوانی میں پوزیشن حاصل کرنے والے طلبا و طالبات میں انعامات تقسیم کرنے کی تقریب سے خطاب کررہے تھے۔

انہوں نے کہا کہ آپ سب کو عید میلاد النبیﷺ مبارک ہو، عید میلاد النبی ﷺہماری دو عیدوں سے زیادہ اہم ہے۔ عید میلاد النبی کے دن ہم نبی پاکﷺ کی ولادت کی خوشی مناتے ہیں۔

(جاری ہے)

تمام بچوں نے خوبصورت نعتیں سنائیں،ہم سب نے سبلیں لگائیں، نعتیں پڑھی،ہر طریقے سے خوشی منائی۔آج فیصلہ کرلیں کہ نبی پاکﷺ کے احکامات کی پیروی کرنی ہے۔اگر ہم آپ کی ایک بھی عادت اپنا لیں تو عید میلاد النبی ﷺمنانے کا مقصد پورا ہوجائے گا۔

نبی پاکﷺ نے حرام کی کمائی سے منع فرمایاہے،ہم سب کو حرام کی کمائی سے بچنا ہے اورصاف زندگی گزارنی ہے۔ حرام کمائی کی دین اجازت دیتا ہے اورنہ ہی حکومت۔ انہوں نے کہا کہ جو بچے نماز نہیں پڑھتے وہ نماز شروع کریں کیونکہ یہ اللہ اوراس کے نبی کا حکم ہے۔بچے جھوٹ بولنے سے اجتناب کریں۔ نبی پاک نے حکم دیا ہے کہ تعلیم حاصل کرو بیشک تمہیں چین جانا پڑے۔

اگر بچے اعلی تعلیم حاصل کرلیں گے تو ہوسکتا ہے کوئی وزیراعلی بن جائے،آرمی کا جنرل یا کسی یونیورسٹی کا وائس چانسلر۔ وزیر اعلی نے کہا کہ سکول ڈیپارٹمنٹ ساڑھے پانچ لاکھ لوگوں پر مشتمل ہے جوتقریباہماری فوج کے برابر ہے۔تقریب سے صوبائی وزیر سکول ایجوکیشن منصور قادر نے بھی خطاب کیا۔تقریب میں سرکاری سکولوں کے بچوں اور بچیوں نے قیصدہ بردہ شریف پڑھا اور خوبصورت انداز میں نعتیں پیش کیں۔

بچوں اور بچیوں نے بارگاہ رسالت میں ہدیہ عقیدت کے پھول پیش کئے۔وزیراعلی محسن نقوی نے نعت رسول مقبول پڑھنے والے بچوں اور بچیوں کی تعریف کی اوران سے شفقت کا اظہار کیا۔وزیر اعلی محسن نقوی نے گورنمنٹ ہائیر سیکنڈری سکول راوی روڈ کی پوزیشن ہولڈرز طالبات کو خصوصی طور پر تقریب میں مدعو کیا اور انہیں انعامات دیئے۔ وزیراعلی محسن نقوی نے نعت خوانی کے مقابلوں میں پوزیشن حاصل کرنے والے طلبا و طالبات میں انعامات اور سرٹیفیکٹس تقسیم کئے۔صوبائی وزرا اظفر علی ناصر،منصور قادر، ڈاکٹرجاویداکرم، مشیروہاب ریاض،سیکرٹری سکول ایجوکیشن،سیکرٹری اطلاعات، سی سی پی او،ڈپٹی کمشنر اورمتعلقہ حکام بھی اس موقع پر موجود تھے۔