عبداللہ شفیق اور محمد رضوان نے ورلڈ کپ میں تاریخ رقم کردی

حیدر آباد (اردو پوائنٹ تازہ ترین اخبار ۔ 10 اکتوبر 2023ء ) سری لنکا کو شکست، پاکستان نے اپنی ورلڈکپ کی تاریخ کا سب سے بڑا ہدف حاصل کر لیا، پہلی بار 2 پاکستانی بیٹرز نے ورلڈ کپ مقابلے میں سنچری سکور کرڈالی ۔ حیدرآباد کے راجیو گارندھی کرکٹ سٹیڈیم میں کھیلے جارہے میچ میں سری لنکا کے اوپنرز ایک بار پھر ٹیم کو اچھا آغاز دینے میں ناکام رہے، کوشل پریرا صفر پر پویلین لوٹے، دوسری وکٹ کی شراکت میں پاتھم نسانکا اور کوشل پریرا نے 102 رنز کی پارٹنرشپ قائم کی تاہم نسانکا 51 رنز بناکر آؤٹ ہوئے۔

جارحانہ انداز میں کھیلنے والے کوسال مینڈس کو حسن علی نے 122 رنز پر کیچ آؤٹ کرایا۔ حسن علی نے اپنے اگلے ہی اوور کی پہلی گیند پر پاکستان کے لیے چوتھی وکٹ بھی حاصل کی۔ انہوں نے اسالنکا کو ایک رن پر کیچ آؤٹ کرایا۔

(جاری ہے)

دھننجایا ڈی سلوا 25، کپتان داسن شناکا 12 اور دینتھ ولالگے 10 رنز کے سوا کوئی اور کھلاڑی دہرا ہندسہ عبور نہ کرسکا۔ کوشال مینڈس 122 اور سمارا وکرما 108 رنز بناکر نمایاں رہے۔

سری لنکا نے مقررہ 50 اوورز میں 9 وکٹوں کے نقصان پر 344 رنز بنائے، ورلڈ کپ کے میچ میں پاکستان کیخلاف یہ کسی بھی ٹیم کا سب سے بڑا سکور ہے، اس سے قبل پاکستان کیخلاف ورلڈکپ میں سب سے بڑا اسکور 336 رنز تھا جو بھارت نے 2019ء ورلڈ کپ میں بنایا تھا۔ گرین شرٹس کے حسن علی نے 4، حارث روف نے 2 جبکہ شاہین آفریدی، شاداب اور محمد نواز نے 1، 1 وکٹ اپنے نام کی ہے۔

سری لنکا کیخلاف پاکستان کی اننگز کا آغاز انتہائی مایوس کُن رہا۔ پاکستان کی پہلی وکٹ 16 اور دوسری 37 رنز پر گر گئی۔ اوپنر امام الحق 12 اور کپتان بابراعظم 10 رنز پر آؤٹ ہوگئے۔ دو وکٹیں جلدی گرنے کے بعد عبداللہ شفیق اور محمد رضوان نے ٹیم کو سہارا دیا۔ دونوں کے مابین تیسری وکٹ پر 178 رنز کی شراکت قائم ہوئی۔ بعد ازاں عبداللہ شفیق 115 رنز بناکر آؤٹ ہوگئے۔

یہ ان کی ون ڈے انٹرنیشنل میں پہلی سنچری تھی۔ پاکستان نے سری لنکا کا 345 رنز کا ہدف 4 وکٹوں کے نقصان پر 49 ویں اوور میں پورا کیا، عبداللہ شفیق 112 اور محمد رضوان 131 ناٹ آئوٹ رنز بناکر نمایاں رہے۔ 345 رنز کا ہدف ورلڈکپ کی تاریخ میں کسی بھی ٹیم کی جانب سے کامیابی سے حاصل کیا ہوا سب سے بڑا ہدف کا تعاقب ہے۔ اس سے قبل ورلڈ کپ 2011ء میں آئرلینڈ نے انگلینڈ کیخلاف 329 رنز کا ہدف کامیابی سے حاصل کیا تھا۔

قبل ازیں سری لنکن کپتان داسن شناکا نے ٹاس جیت کر پہلے بیٹنگ کرنے کا فیصلہ کیا، انہوں نے کہا کہ پاکستان کیخلاف بڑا ٹارگٹ سیٹ کرنے پر پریشر بڑھانے کی کوشش کریں گے، ایونٹ میں پہلی کامیابی حاصل کرنے کیلئے پُرعزم ہیں۔ اس موقع پر قومی ٹیم کے کپتان بابراعظم نے کہا کہ میچ کامیابی کے ساتھ جیت کے تسلسل کو برقرار رکھنا چاہتے ہیں۔ دونوں ٹیموں میں ایک ایک تبدیلی کی گئی ہے، سری لنکا کسن راجیتھا کی جگہ مہیش تھیکشنا جبکہ پاکستان نے فخر زمان کی جگہ عبداللہ شفیق کو پلئینگ الیون کا حصہ بنایا ہے۔

اس سے قبل دونوں ٹیمیں ورلڈکپ کے عالمی مقابلوں میں 7 بار آمنے سامنے آئی ہیں جہاں پاکستان پلڑا بھاری ہے، گرین شرٹس نے 0-7 سے آئی لینڈرز پر برتری قائم کررکھی ہے۔ پاکستان اسکواڈ کپتان بابراعظم، عبداللہ شفیق، امام الحق، محمد رضوان، سعود شکیل، افتخار احمد، شاداب خان، محمد نواز، حسن علی، شاہین آفریدی اور حارث رؤف پر مشتمل ہے جب کہ سری لنکن سکواڈ میں کپتان داسن شناکا، پاتھم نسانکا، کوشل پریرا، کوشل مینڈس، سدیرا سمارا وکرما، چارتھ اسالنکا، دھننجایا ڈی سلوا، مہیش تھیکشنا، دلشان مدوشنکا، متھیشا پتھیرانا اور ڈینوتھ ویلالگے شامل ہیں۔