شاہد آفریدی نے دورہ آسٹریلیا کیلئے پاکستان کرکٹ ٹیم کے کپتان کیلئے نام تجویز کر دیا

لاہور (اُردو پوائنٹ اخبارتازہ ترین۔ 13 نومبر2023ء) شاہد آفریدی نے دورہ آسٹریلیا دوران پاکستان کرکٹ ٹیم کے کپتان کیلئے نام تجویز کر دیا، سابق کپتان نے آسٹریلیا کے دورے کو اہم قرار دے دیا، پاکستان کرکٹ بورڈ کو گراس روٹ کرکٹ پر کام کرنے کا مشورہ۔ تفصیلات کے مطابق سابق کپتان شاہد آفریدی نے کہا ہے کہ قومی ٹیم کے دورہ آسٹریلیا میں بابر اعظم کو ہی کپتان ہونا چاہیے،گراس روٹ کرکٹ پر کام کرنے کی ضرورت ہے ۔

میڈیا سے گفتگو کرتے ہوئے شاہد آفریدی نے کہا کہ ورلڈ کپ میں پاکستانی ٹیم سے کافی امید تھی۔ ہمارے پاس اچھے کھلاڑی بھی تھے اور کنڈیشنز بھی۔ پاکستان نے صلاحیت کے مطابق کارکردگی نہیں دکھائی۔شاہد آفریدی نے کہا ورلڈ کپ کے بعد ماحول اسی طرح کا ہوتا ہے۔

(جاری ہے)

بڑے ایونٹ میں آپ کو پریشر لینا ہوتا ہے۔ بابر اعظم کو ہی دورہ آسٹریلیا میں کپتانی کرنا چاہیے۔

یہ دورہ پاکستان کے لیے اہم ہوگا۔ ورلڈ کپ میں جن ٹیموں نے اچھا کھیلا وہ اوپر ہیں۔ انہوں نے کہا کہ آپ اتنی غلطیاں کریں گے تو پھر جیت نہیں سکتے۔ دوسری جانب بھارت میں کھیلے جا رہے کرکٹ ورلڈکپ میں قومی کرکٹ ٹیم کی ناقص کارکردگی کے بعد پاکستان کرکٹ بورڈ نے بڑے ایکشن کی تیاریوں شروع کر دی ہیں۔ خاص کر ٹیم کے کوچنگ اسٹاف کی تبدیلی سے متعلق اہم فیصلے ہونے کا امکان ہے۔

میڈیا رپورٹس کے مطابق پاکستان کرکٹ ٹیم کے دورہ آسٹریلیا سے قبل کوچنگ کے لیے سابق آسٹریلوی کرکٹر جسٹن لینگر کا نام بھی سامنے آ رہا ہے تاہم ذرائع کا بتانا ہے کہ کرکٹ بورڈ کے کچھ اعلیٰ عہدیدار آسٹریلیا کا دورہ سر پر ہونے کی وجہ سے تبدیلیاں نہ کرنے کا مشورہ دے رہے ہیں۔ جبکہ پی سی بی حکام ٹیم ڈائریکٹر مکی آرتھر کی وطن واپسی کے منتظر ہیں۔

ذرائع کے مطابق مکی آرتھر 15 اور 16 نومبر کی درمیانی شب دبئی سے لاہور پہنچیں گے۔ مکی آرتھر کی آمد کے بعد منجمںٹ کے اراکین سے ملاقات کا سلسلہ شروع ہو گا ۔ پی سی بی کو ٹیم ڈائریکٹر ہیڈکوچ، مینجر اور کپتان کی رپورٹ کا بھی انتظار ہے ۔ پی سی بی کے چیئرمین اگلے ایک دو روز میں کرکٹرز کے ساتھ مشاورتی عمل بھی شروع کریں گے ۔ پی سی بی ہیڈ کوارٹرز میں اس ہفتے اہم مشاورت کا آغاز ہو گا جس میں پاکستان کرکٹ بورڈ کی مینجمنٹ کمیٹی کے چیئرمین ذکا اشرف سابق کپتانوں اور سابق کرکٹرز سے ملاقاتیں کریں گے۔

ذرائع کے مطابق ذکاء اشرف کی جانب سے ٹیکنیکل کمیٹی کے سربراہ مصباح الحق سے فیڈ بیک لیا جائے گا، عمر گل، اظہر علی، سعید اجمل، مشتاق احمد، عاقب جاوید، محسن حسن خان سے مشاورت ہو گی جبکہ سابق کپتان محمد حفیظ سے ایک بار پھر بورڈ رابطہ کرنے کا خواہشمند ہے۔ ذرائع کا یہ بھی بتانا ہے کہ سابق کپتان معین خان سے بھی مشاورت کی جائے گی اور شاہد آفریدی سے چیئرمین ذکا اشرف دوسری مرتبہ ملیں گے۔ اس ہونے والی ملاقات کے بارے میں ذرائع کا کہنا ہے کہ چیئرمین کوچنگ سٹاف میں تبدیلیوں کے حوالے سے مشاورت کریں گے اور کوچنگ سٹاف کے معاہدوں پر قانونی مشاورت ہو گی جبکہ ریڈ اور وائٹ بال کے لیے الگ الگ کپتان بھی مشاورتی ایجنڈے میں شامل ہوں گے۔