کمشنر لاہور محمد علی رندھاوا کی زیر صدارت انسداد سموگ اقدامات کاجائزہ اجلاس

لاہور (اُردو پوائنٹ اخبارتازہ ترین - اے پی پی۔ 20 نومبر2023ء) کمشنر لاہور محمد علی رندھاوا نے انسداد سموگ بروقت اقدامات کے جائزہ اجلاس میں خلاف ورزی پر سخت ایکشن کی ہدایت کر دی۔ کمشنرلاہور محمد علی رندھاوا نے کہا کہ شہریوں کو ماسک کے استعمال کے لیے آگہی فراہم کی جائے۔ اس کیلئے جامع حکمت عملی اپنائی جائے۔ انہوں نے کہا کہ خصوصی پروگرام کے تحت ماسک کی پابندی لازمی کی جائے، شہریوں کو ماسک لگانے کی ترغیب دیں۔

کمشنر لاہور نے کہا کہ شمالی لاہور و محمود بوٹی ایریا میں صنعتی یونٹس کی چیکنگ پر 6 یونٹس پر کارروائی کرتے ہوئے مقدمات بھی درج کرائے گئے۔ کمشنر لاہور نے ہدایت کی کہ لاہور ڈویژن کے تمام ڈی سیز انسداد سموگ کے اقدامات پر عملدرآمد یقینی بنائیں۔ کمشنر لاہور نے کہا کہ حکومت کی جانب سے جاری ہدایات کے عین مطابق سکولوں کی بندش بارے ہفتے کی پابندی لازمی یقینی بنائی جائے۔

(جاری ہے)

اجلاس میں فصلوں کی باقیات جلانے کے خلاف کیے گئے ایکشن کی رپورٹ پیش کی گئی۔ کمشنر لاہور نے کہا کہ ڈی سیز ننکانہ و شیخوپورہ موٹروے سے مانیٹرنگ کو سخت ترین کریں۔ فصلوں کو آگ لگانے والوں کیخلاف موقع پر کاروائی کریں۔ انسداد سموگ کاروائیوں کے دوران گاڑیوں کے 16812 چالان جبکہ 3 کروڑ 29 لاکھ جرمانہ بھی عائد کیا گیا۔ کمشنر لاہور کو بریفنگ میں بتایا گیا کہ انسداد سموگ کاروائیوں میں 7733 گاڑیاں بند جبکہ 1760 ٹرالیاں وغیرہ بھی بند کردی گئی ہیں۔

انسداد سموگ کاروائیوں کے دوران12971گاڑیوں کے فٹنس سرٹیفکیٹ چیک کئے گئے۔ ایکسائز ڈیپارٹمنٹ کے ساتھ مل کر دھواں چھوڑنے والی گاڑیاں بند کی جارہی ہیں۔ آلودگی کا باعث بننے والی گاڑیوں کے خلافت سخت ایکشن لینے کی ہدایت ہے۔ شہر کے مصروف ترین 32 پوائنٹس پر ایم سی ایل، ایل ڈی اے، ضلعی انتظامیہ مل کر تجاوزات کے خلاف آپریشن کریں۔ کمشنر لاہور نے کہا کہ مصروف ترین پوائنٹس پر تجاوزات کے خاتمے سے ٹریفک کی بہتر روانی یقینی بنائی جا سکے گی۔

سموگ شکایات و اطلاعات کیلئے ہیلپ لائن نمبر ۔وٹس اپ نمبراور سوشل میڈیا اکاونٹس پبلک ہیں۔ کمشنر لاہور نے کہا کہ 24گھنٹوں میں شکایت کا ازالہ نہ ہونے پر کمشنر لاہور آفس خود ازالہ کروائے گا۔ تمام پائیرولسز پلانٹ سیل ہیں۔ کسی نے چلایا تو بلا تردد مسمار کردیا جائے۔ کمشنر لاہور نے کہا کہ ڈی سیز و ڈی پی اوز کی سربراہی میں سکواڈز لاہور تا شیخوپورہ و ننکانہ صاحب موٹروے پر رات کو گشت کررہے ہیں۔

محکمہ ماحولیات جس صنعتی یونٹ کو سیل کریگا۔ اس کو ڈی سیل صرف عدالت کے حکم سے کیا جائیگا۔ جو صنعتی یونٹ خلاف ورزی پر سیل ہونے کے بعد خود ڈی سیل کرتا ہے اس کو مسمار کردیا جائیگا۔ کمشنر لاہور نے کہا کہ شہری سموگ کا سبب بننے والے عوامل کی رابطہ نمبرز پر اطلاع کریں۔ 24گھنٹے میں کاروائی ہوگی۔ چمنی سے کالا دھواں نکلنے پر اضلاع کے ڈی سیز خود ذمہ دارہونگے۔ اجلاس میں ڈی سی شیخوپورہ ڈاکٹر وقار، ڈی سی قصور محمد ارشد بھٹی، ڈی سی ننکانہ محمد ارشد، اے ڈی سی لاہور عمر مقبول، واسا، ایل ڈی اے، ہیلتھ افسران، ایل ڈبلیو ایم سی، پی ایچ اے، پولیس، محکمہ زراعت و دیگرافسران نے شرکت کی۔