پاک فضائیہ کی تاریخ میں پہلی بار کسی ہندو پائلٹ آفیسر نے ٹریننگ مکمل کرلی

دیو آنند کا تعلق صوبہ سندھ کے ضلع بدین کے ایک چھوٹے سے قصبے ٹنڈو باگو سے ہے

ساجد علی ہفتہ 25 نومبر 2023 14:14

رسالپور ( اُردو پوائنٹ اخبارتازہ ترین ۔ 25 نومبر 2023ء ) پاک فضائیہ کی تاریخ میں پہلی بار کسی ہندو پائلٹ آفیسر نے ٹریننگ مکمل کرلی۔ تفصیلات کے مطابق پاکستان ایئرفورس میں نئی تاریخ رقم کرتے ہوئے پہلی بار ایک ہندو پائلٹ آفیسر نے اپنی تربیت مکمل کی ہے، پائلٹ آفیسر دیو آنند پاکستان ایئرفورس کی تاریخ کے پہلے ہندوپائلٹ ہیں جنہوں نے پائلٹ آفیسر کا کمیشن حاصل کیا ہے، پائلٹ افسر دیو آنند نے پی اے ایف اصغر خان اکیڈمی رسالپور سے کمیشن لے کر پاس آؤٹ ہوئے ہیں، جہاں سے انہوں نے پبلک ایڈمنسٹریشن میں چین سے گریجویشن کی ہے، جب کہ پائلٹ آفیسر دیو آنند کا تعلق صوبہ سندھ کے ضلع بدین کے ایک چھوٹے سے قصبے ٹنڈو باگو سے ہے اوران کے بڑا بھائی انیل کمار بھی پاک فوج میں لیفٹیننٹ کرنل ہیں۔

(جاری ہے)

بتایا جارہا ہے کہ پی اے ایف اکیڈمی اصغر خان میں پاکستان ایئر فورس کی پاسنگ آؤٹ پریڈ کا انعقاد ہوا، پاس آؤٹ ہونے والوں میں 148 جی ڈی پائلٹ، 94 انجینئرنگ کورس کے کیڈٹ شامل تھے، ایئر ڈیفنس کے 104، کومبیٹ سپورٹ کورس کے 130 کیڈٹ بھی پاس آؤٹ ہونے والوں میں شامل تھے، نگران وزیراعظم تقریب میں بطور مہمان خصوصی شریک ہوئے جہاں انہوں نے پریڈ کا معائنہ کیا اور پاس آؤٹ ہونے والے کیڈٹس کو مبارکباد دی۔

اس موقع پر خطاب کرتے ہوئے نگران وزیراعظم انوار الحق کاکڑ نے کہا کہ پاس آؤٹ ہونے والے کیڈٹس کو مبارکباد پیش کرتا ہوں، گریجوایشن پریڈ کا معائنہ کرکے بے حد خوشی ہوئی، توقع ہے آپ اپنی ٹریننگ کی بنیاد پر چیلنجز پر قابو پائیں گے، پاکستان کی مسلح افواج اندرونی و بیرونی چیلنجز سے نمٹنے کی بھرپور صلاحیت رکھتی ہے، مسلح افواج کی خدمات ناقابل فراموش ہیں، پاکستان اسلحے کی کسی دوڑ میں شامل نہیں، خوشی ہے کہ پاک فضائیہ نے جدید ٹیکنالوجی سے استفادہ کیا، آئی ٹی کی تبدیلیوں نے سکیورٹی ماحول کو تبدیل کر دیا ہے، ہمیں جدید ٹیکنالوجی سے خود کو ہم آہنگ کرنا ہے۔