سیمنٹ کی برآمدات میں جاری مالی سال کے پہلے 4 ماہ میں سالانہ بنیادوں پر 40.46 فیصد کی نمو ریکارڈ کی گئی

ہفتہ 25 نومبر 2023 22:49

اسلام آباد (اُردو پوائنٹ اخبارتازہ ترین - این این آئی۔ 25 نومبر2023ء) سیمنٹ کی برآمدات میں جاری مالی سال کے پہلے 4 ماہ میں سالانہ بنیادوں پر 40.46 فیصد کی نمو ریکارڈ کی گئی ہے۔پاکستان بیورو برائے شماریات کے اعدادوشمار کے مطابق جاری مالی سال کے پہلے 4 ماہ میں سیمنٹ کی برآمدات سے ملک کو 93.087 ملین ڈالر کا زرمبادلہ حاصل ہواجو گزشتہ مالی سال کی اسی مدت کے مقابلہ میں 40.46 فیصد زیادہ ہے۔

گزشتہ مالی سال کی اسی مدت میں سیمنٹ کی برآمدات سے ملک کو 66.271 ملین ڈالر کا زرمبادلہ حاصل ہوا تھا۔

(جاری ہے)

مقداری لحاظ سے اس مدت کے دورا ن سیمنٹ کی برآمدات میں 81.79 فیصد کی نمو ریکارڈکی گئی ہے۔جاری مالی سال کے پہلے چار ماہ میں 2405798 میٹرک ٹن سیمنٹ کی برآمدات ریکارڈکی گئی۔گزشتہ مالی سال کی اسی مدت میں 1324110 میٹرک ٹن سیمنٹ کی برآمدات ریکارڈکی گئی تھی۔

اکتوبر میں سیمنٹ کی برآمدات میں ماہانہ بنیادوں پر 32.58 فیصد کی نمو ہوئی۔اکتوبر میں سیمنٹ کی برآمدات سے ملک کو 26.405 ملین ڈالر کازرمبادلہ حاصل ہوا۔ گزشتہ مالی سال کی اسی مدت میں سیمنٹ کی برآمدات سے 19.916 ملین ڈالر کا زرمبادلہ حاصل ہوا تھا۔ستمبر کے مقابلہ میں اکتوبر میں سیمنٹ کی برآمدات میں ماہانہ بنیادوں پر 2.35 فیصد کی معمولی کمی ریکارڈکی گئی ہے۔