بزنس کانفیڈنس انڈیکس سروے میں کاروباری اعتماد میں امید افزا ء اضافہ

سروے میں کاروباری اعتماد منفی 18فیصد رہا، گزشتہ سروے میں منفی 25فیصد تھا

بدھ 29 نومبر 2023 12:08

لاہور(اُردو پوائنٹ اخبارتازہ ترین - این این آئی۔ 29 نومبر2023ء) بزنس کانفیڈنس انڈیکس سروے میں پاکستان میں کاروباری اعتماد میں امید افزا ء اضافہ دیکھا گیا، ملک میں کاروباری اعتماد منفی 18فیصد ہے جو گزشتہ سروے میں منفی 25فیصد تھا۔اوورسیز انویسٹرزچیمبرآف کامرس اینڈانڈسٹری کے تحت بزنس کانفیڈنس انڈیکس سروے کے نتائج جاری کردئیے گئے ، سروے میں پاکستان میں کاروباری اعتماد میں امید افزا ء اضافہ دیکھا گیا۔

ملک بھر میں اکتوبر تا نومبر 2023بزنس کانفیڈنس انڈیکس سروے ویو 24کے نتائج کے تحت گزشتہ سروے ویو 23کے مقابلے میں مجموعی طور پر 7فیصد بہتری کی نشاندہی کی گئی، ملک میں کاروباری اعتماد منفی 18فیصد ہے جو گزشتہ سروے میں منفی 25فیصد تھا۔بزنس کانفیڈنس انڈیکس سروے میں کاروباری اعتماد میں مینوفیکچرنگ سیکٹر میں سب سے زیادہ اضافہ 9 فیصد اور خدمات کے شعبے میں 8فیصد اضافہ ریکارڈ کیا گیا۔

(جاری ہے)

اس کے علاوہ ریٹیل، ہول سیل ٹریڈ میں گزشتہ کے منفی 35فیصد کے مقابلے میں منفی 31فیصد ریکارڈ کیا گیا۔مثبت رجحان کے باوجود سروے کے شرکا ء میں سے تین چوتھائی نے تشویش کا اظہار کیا کہ موجودہ معاشی صورتحال ان کے کاروبار کو متاثرکرسکتی ہے۔صدراوآئی سی سی آئی عامرپراچہ نے سروے رپورٹ کے حوالے سے کہا کہ خدشات گزشتہ سروے کے تاثرات سے مطابقت رکھتے ہیں۔ بی سی آئی کاروباری اعتماد میں بہتری کی وجہ نسبتاًمستحکم ہے۔