گورنر پنجاب بلیغ الرحمن سے جرمن سفیر الفریڈ گراناس کی ملاقات

باہمی دلچسپی کے امور، تعلیم، ماحولیات اور تجارت میں تعاون کو فروغ دینے پر تبادلہ خیال

بدھ 29 نومبر 2023 23:21

گورنر پنجاب بلیغ الرحمن سے جرمن سفیر الفریڈ گراناس کی ملاقات

لاہور (اُردو پوائنٹ اخبارتازہ ترین - این این آئی۔ 29 نومبر2023ء) گورنر پنجاب محمد بلیغ الرحمن سے گورنر ہائوس لاہور میں جرمنی کے سفیر الفریڈ گراناس نے ملاقات کی۔ ملاقات کے دوران باہمی دلچسپی کے امور، تعلیم، ماحولیات اور تجارت میں تعاون کو فروغ دینے پر تبادلہ خیال کیا گیا۔اس موقع پر گفتگو کرتے ہوئے گورنر پنجاب محمد بلیغ الرحمن نے کہا کہ پاکستان جرمنی کے ساتھ اپنے تعلقات کو قدر کی نگاہ سے دیکھتا ہے اور مختلف شعبوں خصوصا تعلیم، ماحولیات، ٹیکنالوجی، توانائی اور تجارت میں تعلقات کو مزید وسعت دینا چاہتا ہے۔

انہوں نے کہا کہ پاکستان کو موسمیاتی تبدیلیوں کے باعث سیلاب کی تباہ کاریوں کا سامنا کرنا پڑا۔ گورنر پنجاب نے کہا کہ سیلاب متاثرین کی مدد کے لیے جرمنی کی حکومت کے مشکور ہیں۔

(جاری ہے)

انہوں نے کہا کہ دونوں ممالک کو موسمیاتی تبدیلی سے متعلق چیلنجوں سے نمٹنے اور موسمیاتی شراکت داری کے معاہدے کو جلد حتمی شکل دینے کے لیے کوششیں جاری رکھنے کی ضرورت ہے۔

گورنر پنجاب نے کہا کہ ہم GSP پلس سٹیٹس کے لیے پاکستان کی مسلسل حمایت پر جرمنی کا شکریہ ادا کرتے ہیں۔گورنر پنجاب نے مزید کہا کہ تعلیمی شعبے میں جرمن طالب علموں اور پاکستانی طالب علموں کے درمیان ایکسچینج پروگرام ترتیب دینے چاہیے ۔انہوں نے کہا کہ تعلیمی ایکسچینج پروگرام سے دونوں ممالک کے درمیان عوامی سطح پر روابط مضبوط ہوں گے۔گورنر پنجاب نے کہا کہ جرمن حکومت پاکستانی طلبا اور بزنس مین کو ویزا پالیسی میں سہولت پیدا کرے۔

گورنر پنجاب محمد بلیغ الرحمن نے فلسطین میں جاری اسرائیلی ظالمانہ کاروائیوں کی مذمت کرتے ہوئے کہا کہ اقوام متحدہ بالخصوص عالمی برادری کو فلسطین غزہ میں معصوم شہریوں پر جاری ظلم و ستم کو روکنے میں اپنا ادا کرنا چاہئے۔ جرمنی کے سفیر الفریڈ گراناس نے کہا کہ جرمنی میں مقیم پاکستانی نژاد آصفہ اختر کو سائنسی تحقیق کے اعلی ایوارڈ سے نوازا گیا ہے۔

انہوں نے کہا کہ جرمن حکومت فلسطینیوں کے لیے انسانی ہمدردی کے تحت امداد بھیج رہی ہے۔جرمن سفیر الفریڈ گراناس نے کہا کہ جرمن سفارتخانے میں ویزوں میں تاخیر کے مسلے کو حل کرنے کے لیے اقدامات اٹھائے گئے ہیں۔ سفارتخانے میں اسٹاف بڑھایا گیا ہے جس سے جلد ویزوں کے اجرا کو یقینی بنایا جا رہا ہے۔ انہوں نے کہا کہ جرمنی موسمیاتی تبدیلی کے مسلے سے نمٹنے کے لیے پاکستان کے ساتھ تعاون کرے گا۔