مونس الٰہی کے خلاف اشتہاری کی کاروائی شروع

عدالتی حکم پر مختلف مقامات پر اشتہارات آویزاں کردیئے گئے

ساجد علی جمعرات 30 نومبر 2023 11:11

مونس الٰہی کے خلاف اشتہاری کی کاروائی شروع

لاہور ( اُردو پوائنٹ اخبارتازہ ترین ۔ 30 نومبر 2023ء ) پاکستان تحریک انصاف کے رہنماء چوہدری مونس الٰہی کے خلاف ایف آئی اے منی لانڈرنگ مقدمے میں بڑی پیشرفت ہوگئی۔ میڈیا رپورٹس کے مطابق عدالت کے حکم پر سابق وفاقی وزیر کے خلاف اشتہاری کی کاروائی شروع کردی گئی ہے اور اس حوالے سے چوہدری مونس الٰہی سے متعلق مختلف مقامات پر اشتہارات آویزاں کردیئے گئے، جن کے ذریعے پاکستان تحریک انصاف کے رہنماء کو آج عدالت میں پیش ہونے کی مہلت دی گئی ہے۔

نگراں وفاقی حکومت نے چوہدری مونس الہٰی کو وطن واپس لانے کے لیے قانونی عمل کا آغاز کرتے ہوئے انٹرپول سے رابطہ کیا ہے، ایف آئی اے کی جانب سے انٹرپول حکام سے رابطے کیا گیا، ایف آئی اے اور نگراں وفاقی حکومت نے مونس الہٰی سے متعلق تمام ڈیٹا مانگا تھا جو نگراں پنجاب حکومت نے ایف آئی اے کے حوالے کردیا جس کے بعد چوہدری مونس الہٰی کے خلاف تمام مقدمات کی تفصیل انٹرپول حکام سے شیئر کی گئی ہیں اور گرفتاری کے لیے ریڈ نوٹس جاری کرانے کا عمل شروع ہوگیا۔

(جاری ہے)

علاوہ ازیں سابق وزیراعلیٰ پنجاب پرویزالہیٰ کے صاحبزادے مونس الہٰی کی منجمد ہونے والی جائیداد اور بینک اکاونٹس کی تفصیلات بھی سامنے آئی ہیں، مونس الٰہی کے خلاف ایف آئی اے منی لانڈرنگ کیس میں عدالتی حکم پر بینک اکاؤنٹس منجمد کیے گئے ہیں، مونس الہٰی کے لاہور میں 8 مختلف بینک اکاؤنٹس منجمد ہوئے، ان بینک اکاؤنٹس میں 48 کروڑ 76 لاکھ سے زائد کی رقم منتقل ہوئی تاہم سابق وفاقی وزیر نے ساری رقم ان بینک اکاؤنٹس سے نکلوا لی۔

دستاویز میں بتایا گیا ہے کہ مونس کے رقم جمع کرانے اور منتقل کرنے میں استعمال ہونے والے بینک اکاؤنٹس منجمد کیے گئے ہیں، مونس الٰہی کی 6 مختلف پراپرٹیز کو بھی منجمد کیا گیا ہے، ان کی قصور میں 5 اور راولپنڈی میں ایک پراپرٹی کو منجمد کیا گیا۔ واضح رہے کہ احتساب عدالت نے منی لانڈرنگ کیس میں سابق وفاقی وزیر اور پاکستان تحریک انصاف کے رہنما مونس الہیٰ کو اشتہاری قرار دیا اور مونس الہیٰ کے تمام بینک اکاؤنٹس منجمد کرنے کا حکم دیا، اس سلسلے میں نیب کی جانب سے پی ٹی آئی رہنماء کو اشتہاری قرار دینے کی کارروائی مکمل کرلی گئی اور عدالت میں نیب کی جانب سے رپورٹ بھی پیش کر دی گئی۔

پتا چلا ہے کہ 04 نومبرکو عدالت نے منی لانڈرنگ کیس میں چوہدری مونس الہی کو گرفتار کرکے پیش کرنے کا حکم دیا تھا، ایف آئی اے منی لانڈرنگ کیس میں عدالت کی جانب سے چوہدری مونس الہی کے ناقابل ضمانت وارنٹ گرفتاری جاری کرتے ہوئے انہیں عدالت میں پیش کرنے کا حکم دیا تھا۔ اس حوالے سے خصوصی عدالت سینٹرل کے جج تنویر احمد شیخ نے تحریری حکم جاری کیا، جس میں کہا گیا تھا کہ مونس الہی کے قابل ضمانت وارنٹ گرفتاری پر عمل درآمد نہیں ہوا اور ایف آئی اے نے رپورٹ جمع کرائی کہ چوہدری مونس الہی اسپین کے دیئے گئے پتے پر موجود نہیں، اس لیے مونس الہی کی گرفتاری کے لیے ناقابل ضمانت وارنٹ گرفتاری جاری کیے جاتے ہیں۔