علامہ اقبال اوپن یونیورسٹی میں پاکستان کا پہلا سیرہ ڈیجیٹل ریسورس سینٹر قائم

جمعرات 30 نومبر 2023 17:21

اسلام آباد (اُردو پوائنٹ اخبارتازہ ترین - اے پی پی۔ 30 نومبر2023ء) پیغمبر اسلام حضرت محمدﷺ کی تعلیمات پر تحقیقی کام میں طلبہ کو تعلیمی سپورٹ فراہم کرنے کے لئے علامہ اقبال اوپن یونیورسٹی نے اپنی مرکزی لائبریری میں پاکستان کا پہلا سیرہ ڈیجیٹل ریسورس سینٹر قائم کردیا ہے۔ کلیہ عربی و علوم اسلامیہ کے ڈین پروفیسر ڈاکٹر شاہ محی الدین ہاشمی نے گذشتہ روز اِس سینٹر کا باقاعدہ افتتاح کیا اور امید ظاہر کی کہ اوپن یونیورسٹی کی لائبریری میں سیرت کا یہ ڈیجیٹل سینٹرتدریس و تحقیق کے میدان میں ایک اہم سنگ میل ثابت ہوگا۔

انہوں نے کہا کہ سیرت کو ڈیجیٹلائز کرنا ادارے کے لئے باعث برکت ہوگا۔انہوں نے کہا کہ نئی نسل کتابوں سے دور اور ڈیجیٹل ڈیواسز سے منسلک ہے اور اُن کو سیرت سے جوڑنے کے لئے سیرت کے کام کو ڈیجٹل کرنا ضروری تھا، سیرہ ڈیجٹل ریسورس سینٹر کے قیام پر چیف لائبریرین، ڈاکٹر صاحبزادہ شاہ فرخ مبارکباد کے مستحق ہیں۔

(جاری ہے)

تقریب سے خطاب کرتے ہوئے ڈاکٹر صاحبزادہ شاہ فرخ نے کہا کہ یہ پاکستان کا پہلا سیرہ ڈیجٹل ریسورس سینٹر ہے جس میں سیرت پر کتابوں کے علاوہ ڈیجٹل ریسورسز(تصاویر، آڈیوز، ویڈیوز، پی ڈی ایف اور نقشے وغیرہ )کا ذخیرہ دستیاب کیا گیا ہے۔

انہوں نے کہا کہ اس سینٹر کے لئے پہلے مرحلے میں سیرت پر 1342کتابیں خرید ی گئی ہیں۔انہوں نے کہا کہ لائبریری ٹیم نے کلیہ عربی و علوم اسلامیہ اور شعبہ سیرت سٹڈیر کے تعاون اور مشاورت سے سیرت پر مواد نظر ثانی کے بعد کیٹلاگ بنا کر ڈیٹا بیس میں شامل کیا۔شاہ فرخ نے کہا کہ سینٹرکے قیام سے ادارہ مزید ممتاز ہوگا۔انہوں نے کہا کہ اس اقدام کے لئے بھرپور تعاون پرہم وائس چانسلر، پروفیسرڈاکٹر ناصر محمود کے شکرگزار ہیں۔تقریب کے اختتام پر شعبہ سیرت سٹڈیز کے چئیرمین ڈاکٹر شاہ معین الدین ہاشمی سے سیرہ ڈیجٹل ریسورس سینٹر کی کامیابی اور یونیورسٹی کی مجموعی ترقی کے لئے دعا کرائی۔

Facebook Twitter Google + Share on Whatsapp

علامہ اقبال اوپن یونیورسٹی میں پاکستان کا پہلا سیرہ ڈیجیٹل ریسورس سینٹر قائم

متعلقہ عنوان :

مزید تعلیم کی خبریں