سموگ کے پیش نظرپنجاب میں (کل ) تعلیمی ادارے بند رکھنے کا فیصلہ، کاروبارہفتہ ، اتوارمعمول کے مطابق جاری رہے گا

جمعہ 1 دسمبر 2023 12:28

لاہور (اُردو پوائنٹ اخبارتازہ ترین - این این آئی۔ 01 دسمبر2023ء) سموگ کے پیش نظر پنجاب حکومت نے آج بروز ہفتہ کو تعلیمی ادارے بند رکھنے کا فیصلہ کیا ہے جبکہ مارکیٹیں، بازار اور کاروباری ادارے کل (ہفتہ ) اور کل بروز اتوار کو معمول کے مطابق کھلے رہیں گے۔وزیراعلی پنجاب محسن نقوی کی زیر صدارت کابینہ کمیٹی برائے انسداد سموگ کا اجلاس ہو جس میں سموگ کی موجودہ صورتحال کا جائزہ لیا گیا، ماہرین ماحولیات اور صحت نے سموگ میں کمی اور سموگ کے مضر اثرات سے بچانے کے لئے تجاویز پیش کیں۔

صوبائی وزرا ایس ایم تنویر، ڈاکٹر جاوید اکرم، منصور قادر،عامر میر، اظفر علی ناصر، ابراہیم حسن مراد، بلال افضل، چیف سیکرٹری، انسپکٹر جنرل پولیس، چیئرمین پلاننگ اینڈ ڈویلپمنٹ بورڈ، ایڈیشنل چیف سیکرٹری داخلہ اور متعلقہ محکموں کے سیکرٹریز اور اعلی حکام نے اجلاس میں شرکت کی۔

(جاری ہے)

اجلاس سے خطاب کرتے ہوئے نگران وزیر اعلی پنجاب محسن نقوی نے کہا کہ تعلیمی ادارے آج بروز ہفتہ بند رہیں گے جبکہ مارکیٹیں، بازار اور کاروباری ادارے ہفتہ اور اتوار کو معمول کے مطابق کھلے رہیں گے۔

محسن نقوی نے کہا کہ ریسٹورنٹس اور دیگر بزنس ہائوسز بھی معمول کے مطابق کھلے رہیں گے، 18 دسمبر سے پنجاب کے تعلیمی اداروں میں موسم سرما کی تعطیلات ہوں گی۔نگران وزیراعلیٰ نے سڑکوں کی صفائی اور پانی کے چھڑکاؤ کا عمل بدستور جاری رکھنے کی ہدایت کی ہے جبکہ دھواں چھوڑنے والی گاڑیوں کے خلاف موثر کریک ڈائون کا حکم بھی دیا ہے۔محسن نقوی نے مزید کہا کہ ٹائر جلانے والی فیکٹریوں کے خلاف بھی بلاامتیاز کارروائی جاری رکھی جائے، سموگ میں کمی کے لئے جو کچھ انسانی بس میں ہے وہ اقدام اٹھارہے ہیں، پوری کوشش ہے کہ ایئرکوالٹی انڈیکس کم سے کم رہے۔