2023 تاریخ کا گرم ترین سال قرار، جولائی میں درجہ حرارت سب سے زیادہ ریکارڈ

جمعہ 1 دسمبر 2023 21:42

دبئی (اُردو پوائنٹ اخبارتازہ ترین - آن لائن۔ 01 دسمبر2023ء) ورلڈ میٹرولوجیکل آرگنائزیشن (ڈبلیو ایم او) نے کہا ہے کہ 2023 تاریخ کا گرم ترین سال ہوگا جو 2016 کا ریکارڈ توڑ دے گا جب دنیا صنعتی اوسط سے تقریباً 1.2 سینٹی گریڈ زیادہ گرم تھی۔ برطانوی خبر رساں ادارے کے مطابق یہ انتباہ ڈبلیو ایم او کی جانب سے دبئی میں کوپ 28 موسمیاتی کانفرنس کے موقع پر جاری رپورٹ میں کیا گیا۔

رپورٹ میں کہا گیا کہ مستقبل 5قریب میں سیلاب، جنگلات میں آتشزدگی، برف پگھلنے اور ہیٹ ویوز جیسے واقعات کی شدت میں نمایاں اضافہ ہو سکتا ہے۔ عالمی ادارے کی رپورٹ میں کہا گیا کہ پیرس معاہدے کے مقاصد کے حصول میں ناکامی کے حوالے سے ایک اور معاہدہ کرنا ضروری ہے۔ بصورتِ دیگر موسمیاتی تبدیلیوں کے بدترین اثرات سے بچنا مشکل ہوگا۔

(جاری ہے)

رپورٹ کے اجرا سے پہلے ڈبلیو ایم او کے سیکرٹری جنرل نے ایک انٹرویو کے دوران کہا کہ 2023 میں عالمی درجہ حرارت صنعتی عہد سے قبل کے مقابلے میں 1.4 ڈگری سینٹی گریڈ زیادہ رہا ہے۔

خیال رہے کہ اس سے قبل ڈبلیو ایم او نے خدشہ ظاہر کرتے ہوئے کہا تھا کہ 98 فیصد امکان ہے کہ آنے والے پانچ سال انسانی تاریخ کے گرم ترین دن ہوں گے۔ اقوام متحدہ کے مطابق 2023 سے 2027 تک کا عرصہ دنیا کی تاریخ کا گرم ترین دور ریکارڈ ہوگا۔ اس حوالے سے سائنسدانوں نے 66 فیصد امکان ظاہر کیا ہے کہ ممکن ہے آنے والے سالوں میں زمین کا درجہ حرارت 1.5 ڈگری کی حد سے تجاوز کرجائے۔ درجہ حرارت اس حد تک تجاوز کرنے کا مطلب یہ ہے کہ دنیا 19 ویں صدی کے دوسرے نصف کے مقابلے زیادہ گرم ہوگی۔