ڈرائیونگ لائسنس کی فیس میں اضافے کی منظوری،اطلاق یکم جنوری سے ہوگا

لاہور (اُردو پوائنٹ اخبارتازہ ترین - اے پی پی۔ 05 دسمبر2023ء) وزیراعلی پنجاب محسن نقوی کی زیر صدارت سول سیکرٹریٹ میں صوبائی کابینہ کا 33 واں اجلاس منعقد ہوا۔اجلاس میں ڈرائیونگ لائسنس کی فیس میں اضافے کی منظوری دی گئی جس کا اطلاق یکم جنوری سے ہوگا۔یکم جنوری سے قبل ڈرائیونگ لائسنس موجودہ شرح فیس سے بنائے جائیں گے۔یکم جنوری سے لرنر کی فیس 60 روپے سے بڑھا کر ایک ہزار روپے کردی جائے گی جبکہ ایل ٹی وی،ایچ ٹی وی، پی ایس وی لائسنس فیس کی شرح میں بھی اضافہ ہوگا۔

امریکہ، کینیڈا اور دیگر ممالک کے شہری آن لائن 100ڈالر ادا کر کے لائسنس حاصل کرسکیں گے۔اجلاس میں سرکاری میڈیکل و ڈینٹل کالجز میں ایم بی بی ایس اور بی ڈی ایس کے طلبا وطالبات کے لئے ٹرانسفر پالیسی کی منظوری دی گئی جس کے تحت میڈیکل کے طلبہ صرف ہائی گریڈ میرٹ سے لو گریڈ میرٹ میڈیکل اینڈ ڈینٹل کالجز میں ٹرانسفر ہوسکیں گے۔

(جاری ہے)

پنجاب کابینہ نے چولستان کے بے زمین کاشتکاروں کو سرکاری اراضی ا لاٹ کرنے کے لئے شفاف قرعہ اندازی کی منظوری دی۔

چولستان میں 3 لاکھ 44 ہزار ایکڑ اراضی بے زمین کاشتکاروں کو دی جائے گی اور بے زمین چولستانی کاشتکار کو ساڑھے 12 ایکڑ زمین خصوصی امدادی نرخ پر دی جائے گی۔اجلاس میں جیلوں کے ہسپتالوں کا انتظام محکمہ پرائمری و سیکنڈری ہیلتھ کے سپردکرنے اور قیدیوں کے لئے ہیلتھ کیئر مینجمنٹ سسٹم کی منظوری دی گئی۔اجلاس میں نرسنگ کی طالبات کی تعداد دگنی کرنے کے لئے فنڈز کے اجرا اورانسٹی ٹیوٹ آف پبلک ہیلتھ لاہور کے لئے انتظامی کمیٹی کے قیام کی منظوری دی گئی۔

اجلاس میں ملتان اور بہاولپور کے ریجنل بلڈ سنٹرز کی مینجمنٹ و آپریشن کے لئے سپیشلائزڈ ہیلتھ کیئر اینڈ میڈیکل ایجوکیشن ڈیپارٹمنٹ اور رجب طیب اردوان ہیلتھ ٹرسٹ کے درمیان معاہدے کی تجدید کی منظوری بھی دی گئی۔کابینہ کے اجلاس میں پنجاب میڈیکل اینڈ ہیلتھ انسٹی ٹیوشن ایکٹ 2003 کے تحت چلڈرن ہسپتال فیصل آباد کو اپ گریڈ کرکے میڈیکل انسٹی ٹیوٹ کا درجہ دینے کا فیصلہ کیاگیاجبکہ ملتان انسٹی ٹیوٹ آف کڈنی ڈیزز میں جنوبی پنجاب کے لئے پی کے ایل آئی ٹو قائم ہوگا۔

اجلاس میں لاہور اور بہاولپور کی یونیورسٹی آف ویٹرنری اینڈ اینمل سائنسز کے وائس چانسلرزکی سیلکشن کے لئے سرچ کمیٹی کے قیام اورپبلک پراسیکیوٹر ڈیپارٹمنٹ کے پراسیکیوٹرز کی ایف آئی اے میں ڈیپوٹیشن کی بنیاد پر تعیناتی کے لئے پالیسی فریم ورک کی منظوری دی گئی۔اجلاس میں پنجاب سپیشل پریمیسز(پریزرویشن) آرڈیننس 1985 کے تحت باغ جناح کو خصوصی حیثیت دینے کی منظوری دی گئی اور باغ جناح کی تاریخی اہمیت کے پیش نظر انتظامی امور والڈ سٹی اتھارٹی کے سپرد کرنے کا فیصلہ کیا گیا۔

چنیوٹ کے تاریخی عمر محل کا انتظام بھی والڈ سٹی اتھارٹی کے سپرد کرنے کا فیصلہ کیا گیا۔ پنجاب وائلڈ لائف رولز 1974 کے تحت شوٹنگ لائسنس اور فیس پر نظر ثانی کی منظوری دی گئی۔اجلاس میں گوجر خان میں یونیورسٹی آف پنجاب کا پوٹھوہار کیمپس قائم کرنے کی منظوری دی گئی۔ کابینہ نے نیشنل ہائی ویز اینڈ موٹروے پولیس کے ساتھ موٹر وہیکلز رجسٹریشن کی معلومات کے تبادلے کے معاہدے کی منظوری دی۔اجلا س میں کابینہ سٹینڈنگ کمیٹی برائے قانونی امور ونجکاری کے 10ویں اور 11ویں اجلاس کے فیصلوں کی تو ثیق کی گئی۔صوبائی وزرا، مشیران، چیف سیکرٹری، انسپکٹرجنرل پولیس، ایڈووکیٹ جنرل پنجاب، اعلی حکام اور متعلقہ سیکرٹریز نے اجلاس میں شرکت کی۔