اے این ایف نے مختلف شہروں سے منشیات اسمگلنگ میں ملوث 6 خواتین کو گرفتار کرلیا

بدھ 6 دسمبر 2023 23:15

اسلام آباد (اُردو پوائنٹ اخبارتازہ ترین - این این آئی۔ 06 دسمبر2023ء) اینٹی نارکوٹکس فورس (اے این ایف) نے مختلف شہروں سے منشیات اسمگلنگ میں ملوث 6 خواتین کو گرفتار کرلیا۔اے این ایف کے مطابق 5 کارروائیوں میں گرفتار خواتین سے 26 کلوگرام سے زائد منشیات برآمد کی گئی ہے جو بین الصوبائی اور بین الاقوامی سطح پر منشیات اسمگلنگ میں ملوث ہیں۔ترجمان اے این ایف نے بتایا کہ خواتین کے مختلف منشیات اسمگلنگ گروہوں کے ساتھ تعلق ہونے کا انکشاف ہوا ہے۔

(جاری ہے)

ترجمان کے مطابق علامہ اقبال انٹرنیشنل ائیرپورٹ پر کارروائی کرتے ہوئے ایک خاتون کے پیٹ سے 87 ہیروئن سے بھرے کیپسول برآمد کیے جب کہ ملتان ائیرپورٹ پر خاتون اور ایک شخص گرفتار کیا گیا جن کے بیگ سے 855گرام آئس برآمد ہوئی۔اے این ایف کے مطابق علامہ اقبال انٹرنیشنل ائیرپورٹ پر ایک اور کارروائی کی گئی جس میں خاتون کے بیگ سے 1.942 کلوگرام آئس برآمد ہوئی ،اورنگی ٹاؤن میں 2 خواتین کو گرفتار کرکے کے ان کے قبضے سے 22.8کلو چرس برآمد کی گئی ہے۔ اے این ایف نے بتایا کہ اسلام آباد کے قریب چونگی نمبر 26 پر خاتون کو گرفتار کرکے 750 گرام چرس اور آئس برآمد کی گئی۔