گھوڑہ چوک فلائی اوور منصوبہ تکمیل کے قریب ،95فیصد کام مکمل

منصوبے کی تکمیل اعلی معیار کو ترجیح دی گئی ہے ‘ سی ای او سی بی ڈی پنجاب عمران امین

اتوار 10 دسمبر 2023 06:00

لاہور (اُردو پوائنٹ اخبارتازہ ترین - این این آئی۔ 10 دسمبر2023ء) لاہور میں گھوڑا چوک فلائی اوور تکمیل کر قریب ہے ، منصوبے کا 95 فیصد کام مکمل ہو چکا ہے، فلائی اوور کی دونوں سلوپس پر این جے بیریرز ر اور ڈرین کا کام بھی مکمل ہوچکا ہے ۔ یہ منصوبہ پنجاب سنٹرل بزنس ڈسٹرکٹ ڈویلپمنٹ اتھارٹی (پی سی بی ڈی ڈی ای) نے شروع کیا تھا، جسے سنٹرل بزنس ڈسٹرکٹ پناب (سی بی ڈی پنجاب) بھی کہا جاتا ہے۔

وزیر اعلیٰ پنجاب محسن نقوی کی قیادت میں اعلیٰ معیار کو یقینی بنانے کے لیے اس پراجیکٹ پر نہایت احتیاط سے عملدرآمد کیا گیا ہے۔ وزیر اعلیٰ پنجاب اس منصوبے کی تکنیکی خصوصیات اور بروقت تکمیل کو یقینی بنانے کے لیے خود منصوبے کی سرپرستی اور نگرانی کر رہے ہیں۔ یہ فلائی اوور جلد ہی ٹریفک کے لیے کھول دیا جائیگا، جو لاہور میں ٹرانسپورٹیشن کے بنیادی ڈھانچے کو بہتر کرنے کے لیے ایک اہم قدم ہے۔

(جاری ہے)

سی بی ڈی پنجاب کے سی ای او عمران امین نے پراجیکٹ کی ترقی کے دوران اعلی معیار کے عزم پر زور دیا۔ اپنے خیالات کا اظہار کرتے ہوئے انہوں نے کہا کہ گھوڑہ چوک فلائی اوور پراجیکٹ کا معیار ہمارے عزم کا منہ بولتا ثبوت ہے۔ یہ سنگِ میل لاہور کے بنیادی ڈھانچے کو بہتر کرنے میں مثبت کردار ادا کرے گا ۔حال ہی میں ڈالے گئے کنکریٹ کی پختگی کی جانچ کے لئے ٹیسٹ جاری ہیں۔ گھوڑہ چوک فلائی اوور کی سلوپس پر واٹر باونڈ، ٹاپ بیس اور اسفالٹ مکمل کر لئی گئی ہے، جبکہ سلپ روڈز بھی مکمل ہیں اور ٹریفک کے لئے فعال ہیں۔