ملتان میں ہینڈگرینیڈ، لاہور میں سیوریج پائپ لائن میں دھماکہ، بچہ جاں بحق

دونوں شہروں میں ہونے والے دھماکوں میں تین ، تین افراد زخمی بھی ہوئے

اتوار 10 دسمبر 2023 17:25

ملتان/لاہور(اُردو پوائنٹ اخبارتازہ ترین - این این آئی۔ 10 دسمبر2023ء) ملتان کے علاقے شجاع آباد روڈ پر کبارخانے میں ہینڈ گرینیڈ پھٹنے سے ایک بچہ جاں بحق جبکہ تین افراد زخمی ہوگئے ،ریسکیو حکام کے مطابق بم کباڑ کے سامان میں موجود تھا۔واقعے کی اطلاع ملتے ہی ریسکیو اور امدادی ٹیمیں موقع پر پہنچ گئیں ، افسوس ناک واقعے میں زخمی ہونے والے افراد کو نشترہسپتال منتقل کردیا گیا ہے۔

(جاری ہے)

پولیس نے موقع پر پہنچ کرقانونی کارروائی شروع کر دی ہے۔علاوہ ازیں لاہور کے علاقے مغلپورہ کی آٹو مارکیٹ کے قریب سیوریج پائپ لائن میں دھماکہ ہوا ہے جس کے نتیجے میں تین افراد زخمی ہوگئے۔ریسکیو حکام کے مطابق دھماکہ سیوریج پائپ لائن میں گیس بھر جانے کے باعث ہوا جبکہ دھماکے کے نتیجے میں زخمی ہونے والے افراد کو طبی امداد کے لئے ہسپتال منتقل کر دیا گیا ہے۔دھماکے کے بعد پتھر لگنے سے ایک گاڑی اور کچھ موٹرسائیکلز کو بھی نقصان پہنچا۔