Live Updates

کراچی کنگز نے نئے ہیڈ کوچ کے نام کا اعلان کر دیا

پاکستان سپر لیگ 9 کیلئے ویسٹ انڈیز کے سابق کرکٹر کراچی کی کوچنگ کے فرائض انجام دیں گے

محمد علی پیر 11 دسمبر 2023 20:33

لاہور (اردو پوائنٹ تازہ ترین اخبار ۔ 11 دسمبر 2023ء ) کراچی کنگز نے نئے ہیڈ کوچ کے نام کا اعلان کر دیا، پاکستان سپر لیگ 9 کیلئے ویسٹ انڈیز کے سابق کرکٹر کراچی کی کوچنگ کے فرائض انجام دیں گے۔ تفصیلات کے مطابق سابق پی ایس ایل چیمپئن کراچی کنگز نے پاکستان سپر لیگ 9 کیلئے اپنی تیاریوں کا بھرپور آغاز کر دیا ہے۔ کراچی کنگز نے پلیئرز ڈرافٹ سے قبل ٹیم کے نئے کوچ کا انتخاب کر لیا۔

ویسٹ انڈیز کے سابق کرکٹر فل سائمنز کو کراچی کنگز کا نیا ہیڈ کوچ تعینات کر دیا گیا ہے۔ اس سے قبل کراچی کنگز اپنے نئے کپتان کا انتخاب بھی کر چکی۔ ذرائع کے مطابق ملتان سلطانز سے رخصت ہو کر کراچی کنگز کا حصہ بننے والے شان مسعود ہی ٹیم کے نئے کپتان ہوں گے، تاہم اس حوالے سے تاحال باضابطہ اعلان نہیں کیا گیا۔

(جاری ہے)

اس کے علاوہ کراچی کنگز نے پاکستان سپر لیگ کے آئندہ سیزن 9 کے لیے پانچ کھلاڑیوں کو برقرار رکھنے کا فیصلہ کیا ہے۔

ذرائع کے مطابق ٹاپ آرڈر بلے باز جیمز ونس، شعیب ملک، فاسٹ بولرز حسن علی، میر حمزہ اور سپنر تبریز شمسی کو برقرار رکھا جائے گا۔ انتظامیہ نے ان کھلاڑیوں پر اعتماد کا اظہار کیا ہے اور وہ مقررہ وقت پر ان پانچوں کھلاڑیوں کے ناموں کا انکشاف کریں گے۔ پی ایس ایل 2020ء کی چیمپئن فرنچائز پاکستانی فاسٹ بولر محمد عامر کو برقرار نہیں رکھا جائے گا، نسیم شاہ کے جانے کی وجہ سے کوئٹہ گلیڈی ایٹرز ان کی ممکنہ اگلی منزل ہے۔

کراچی کنگز کے مڈل آرڈر بلے باز طیب طاہر کے ایک اور فرنچائز کے ساتھ تجارت کرنے کے امکانات ہیں۔ واضح رہے کہ پی ایس ایل سیزن 9 کی ڈرافٹ تقریب 13 دسمبر 2023ء کو نیشنل کرکٹ اکیڈمی، لاہور میں ہونے والی ہے۔ ہر فرنچائز کے آٹھ تک برقرار رکھنے کی تصدیق کرنے کی حتمی تاریخ 7 دسمبر 2023ء ہے۔ پی ایس ایل فرنچائزز سوشل میڈیا پر اپنے حامیوں سے ان کھلاڑیوں کے بارے میں پوچھتی نظر آرہی ہیں جنہیں برقرار رکھا جانا چاہیے۔ آنے والے دن پی ایس ایل کے شائقین کے لیے سرپرائزز سے بھرے ہوں گے کیونکہ ٹیمیں برقرار رکھیں گی جس سے کچھ حیران ہوں گے۔