/ آیت اللہ حافظ ریاض نجفی کی ایرانی سفیر رضاامیری مقدم سے ملاقات ، کرمان کے شہداء پر اظہار تعزیت ، فاتحہ خوانی

حافظ ریاض نجفی نے تعزیتی کتاب میں اپنے تاثرات بھی تحریر کیے، علامہ مرید نقوی ،ڈاکٹر محمد نجفی بھی ملاقات میں شامل پاکستان، ایران کے دکھ سکھ مشترک ،ہماری جغرافیائی ، نظریاتی سرحدیں ملتی ہیں، صدر وفاق المدارس الشیعہ

جمعرات 11 جنوری 2024 20:45

i لاہور (اُردو پوائنٹ اخبارتازہ ترین - آن لائن۔ 11 جنوری2024ء) وفاق المدارس الشیعہ پاکستان کے صدر آیت اللہ حافظ سید ریاض حسین نجفی ، نائب صدر علامہ سید مرید حسین نقوی اور ڈاکٹر سید محمد نجفی نے ایرانی سفیر رضاامیری مقدم سے ملاقات کی اور کرمان کے شہداء پر اظہار تعزیت کیا اور فاتحہ خوانی کی۔ حافظ ریاض نجفی نے اس موقع پر تعزیتی کتاب میں اپنے تاثرات بھی تحریر کیے۔

ایرانی سفیر سے گفتگو میں انہوں نے کہا پاکستان اور ایران کے دکھ سکھ مشترک ہیں۔ ہم ہمسائے ہیں جن کے درمیان اسلام کا رشتہ بہت مضبوط ہے۔ہماری صرف جغرافیائی ہی نہیں، نظریاتی سرحدیں بھی ملتی ہیں۔ پاکستانی عوام میں کرمان میں ایرانی عوام کی شہادت پر بہت رنج و علم پایا جاتا ہے۔ ان کا کہنا تھا کہ پاکستانی عوام ایران کے ساتھ کھڑے ہیں ۔

(جاری ہے)

اور وہ ایرانی قوم کے جذبہ شہادت اور اسلام کے لیے خدمات کی معترف بھی ہیں۔

اور دعا گو ہیں کہ اللہ تعالیٰ شہداء کے درجات کو بلند کرے اورمرحومین کے لواحقین کو صبر جمیل عطا فرمائے۔ شہید جنرل قاسم سلیمانی کے مزار پر دھماکے کا مقصد ایرانی قوم کو ڈراناتھا، لیکن عوام ڈرنے والے نہیں ہیں۔ دھماکے اس بات کا یہ ثبوت بھی ہے کہ دشمن ناکام ہو چکا ہے اور وہ ایرانی قوم کو ڈرا نہیں سکا۔ ان کا کہنا تھا کہ شہید قدس جنرل قاسم سلیمانی کا مشن جاری ہے۔ آج حماس جس انداز سے فلسطینیوں کی حفاظت کر رہی ہے اور اسرائیل کو ناکوں چنے چبوا رہی ہے تو یہ قاسم سلیمانی کی محنتوں کا نتیجہ ہے۔