آزاد امیدوار محمد میاں سومرو کے قافلے پر فائرنگ، کوئی جانی نقصان نہیں ہوا

منگل 30 جنوری 2024 22:13

جیکب آباد (اُردو پوائنٹ اخبارتازہ ترین - این این آئی۔ 30 جنوری2024ء) جیکب آباد میں سابق نگران وزیر اعظم اور حلقہ این اے 190 کے آزاد امیدوار محمد میاں سومرو کے قافلے پر فائرنگ، کوئی جانی نقصان نہیں ہوا۔ تفصیلات کے مطابق جیکب آباد کے قریب مولاداد تھانہ کی حدود قادر پور کے نزدیک سابق نگران وزیر اعظم اور جیکب آباد کے قومی اسمبلی کے حلقہ این ای190 کے آزاد امیدوار محمد میاں سومرو کے قافلے پر نامعلوم افراد کی جانب سے فائرنگ کی گئی، سیکورٹی گارڈز کی جوابی فائرنگ سے ملزمان فرار ہوگئے، ایس ایس پی جیکب آباد کے مطابق قافلے پر فائرنگ کی اطلاع ملی ہے پولیس واقع کی تفتیش کررہی ہے ایس ایس پی کے مطابق محمد میاں سومرو قافلے میں موجود نہیں تھے۔

این اے 190 کے امیدوار محمد میاں سومرو نے کہا کہ گڑہی خیرو میں الیکشن ورک کے بعد جیکب آباد آرہے تھے کہ ہمارے قافلے پر فائرنگ کی گئی جوابی فائرنگ سے ملزمان فرار ہوگئے، انہوں نے کہا کہ امن و امان کی صورتحال خراب ہے اس لیے الیکشن میں پولیس سمیت رینجرس سمیت فوج کو تعینات کیا جائے اور حملہ آوروں کو گرفتار کیا جائے۔

(جاری ہے)

محمد میاں سومرو کے قافلے میں صوبائی حلقہ پی ایس 1 جیکب آباد کے آزاد امیدوار سردار عبدالرزاق کھوسو بھی شامل تھے، پی ایس 1 جیکب آباد کے امیدوار سردار عبدالرزاق کھوسو نے قافلے پر فائرنگ کی مذمت کرتے ہوئے کہا کہ مخالفین بوکھلاہٹ کا شکار ہوچکے ہیں وہ ہمیں خوفزدہ کرنا چاہتے ہیں لیکن ہمارے حوصلے بلند ہیں ہم کسی سے ڈرنے والے نہیں، انہوں نے مطالبہ کیا کہ حملہ آوروں کو گرفتار کرکے ان کی سرپرستی کرنے والوں کو بھی گرفتار کیا جائے۔