صوبائی الیکشن کمیشن پنجاب کی جانب سے ضابطہ اخلاق کی خلاف ورزیوں پر کاروائیاں جاری ہیں، ترجمان

جمعرات 1 فروری 2024 12:28

لاہور (اُردو پوائنٹ اخبارتازہ ترین - اے پی پی۔ 01 فروری2024ء) صوبائی الیکشن کمیشن پنجاب کی جانب سے ضابطہ اخلاق کی خلاف ورزیوں پر کاروائیاں جاری ہیں۔ ترجمان الیکشن کمیشن کے مطابق جمعرات کو ڈسٹرکٹ مانیٹرنگ آفیسر مظفر گڑھ نے امیدوار این اے 175مظفر گڑھ جمشید دستی کو بلااجازت کار ریلی نکالنے پر 50ہزارروپے جرمانہ عائد کیا ۔امیدوار پی پی 268مظفر گڑھ جام محمد یونس کو خلاف ضابطہ تشہیری مواد آویزاں کرنے پر 10ہزار روپے جرمانہ کیا گیا۔

(جاری ہے)

اسی طرح پی پی 209خانیوال امیدوار چوہدری ضیا الرحمن کو ہوائی فائرنگ پر 50ہزار روپے جرمانہ ادا کرنے کے احکامات جاری گئے ۔امیدوار این اے161بہاولنگر محمد اجمل قادری نے 20ہزار روپے جرمانہ سرکاری خزانے میں جمع کروا دئیے۔پی پی 81خوشاب میں انتخابی امیدوار کے حامی محمد اخلاق اعوان پر 10ہزار روپے جرمانہ عائد کیا گیا ۔محمد اخلاق نے ضابطہ اخلاق کے پیرا 41کی خلاف ورزی کرتے ہوئے اشتعال انگیز تقاریر کی تھیں۔ ملتان کے قومی و صوبائی اسمبلی حلقوں سے امیدواران خواجہ صغیر احمد، یوسف رضا گیلانی اور عبدالغفار ڈوگر سمیت 13امیدواران کو وارننگز اور نوٹسز جاری کئے گئے ۔