۱جماعت اسلامی کراچی سے گوادر تک ہر جگہ یکسوئی کے ساتھ اپنی سیاسی حکمت عملی پر کار بندرہے گی، امیرالعظیم

اتوار 11 فروری 2024 20:55

لاہور (اُردو پوائنٹ اخبارتازہ ترین - آن لائن۔ 11 فروری2024ء) سیکرٹری جنرل جماعت اسلامی امیرالعظیم نے کہا کہ جماعت اسلامی کراچی سے گوادر تک ہر جگہ یکسوئی کے ساتھ اپنی سیاسی حکمت عملی پر کار بندرہے گی۔ یہ انتخابات مارچ موومنٹ کی طرف ایک سنگ میل ہے،جماعت اسلامی کی تاریخ ہے کہ جس دور میں بھی جس چیز کو ترجہح دی وہ حاصل کرکے ہی دم لیاہے ۔ان خیالات کا اظہار انہوں نے منصورہ میں حلقہ این اے 126،پی پی169کے کارکنان کے اعزاز میں منعقد ہونے والے تجدید عہد کنونشن سے خطاب کرتے ہوئے کیا۔

اس موقع پر امیر جماعت اسلامی غربی لاہور عبدالعزیز عابد،صدر سیاسی کونسل میاں ظہور احمد وٹو،ذکراللہ مجاہد،ملک شفیق،خواجہ وسیم،صہیب شریف اور دیگر قائدین موجود تھے۔امیر العظیم نے کہا کہ ہم کارکنوں کے جوش و جذبے کی تحسین کرتے ہیں اور ان شاء اللہ ملک میں قرآن و سنت کے نفاذ ،اسلامی فلاحی ریاست کے قیام سے عدل و انصاف کی فراہمی تک ہم اپنی جوجہد کو جاری رکھیں گے ۔

(جاری ہے)

جماعت اسلامی کے کارکنان نے ملک بھر میں یکسوئی سے انتخابی مہم چلا کر پارٹی منشور اور نظریہ اسلام و پاکستان کے پیغام کو ہر گلی کوچے تک پہنچایا ہے۔ہم اپنی جدوجہد جاری رکھیں گے اور مملکت پاکستان کو ایک حقیقی اسلامی اور فلاحی ریاست بنا کر ہی دم لیں گے۔انہوں نے مزید کہا کہ حالیہ انتخابات پر اندرون ملک اور بیرونی سطح پر بھی تنقید ہورہی ہے۔کراچی میں جماعت اسلامی کے مینڈیٹ پر نہیں بلکہ عوامی مینڈیٹ پر شب خون مارا گیا۔مقتدر حلقوں کی جانب سے کھل کر یہ پیغام دیا گیا کہ ووٹ کی کوئی حیثیت نہیں ۔ہم اس دھاندلی پر خاموش نہیں رہیںگے بلکہ آئین اور قانون کے دائرے میں اپنی جدوجہد جاری رکھ تمام ملک دشمن اور جمہوریت دشمن قوتوں کو شکست دیں گے۔