Live Updates

100 فیصد یقین ہے کہ کمشنر راولپنڈی کے تانے بانے بلوچستان والی قوتوں سے ملتے ہیں

وہ قوتیں جو بلوچستان سمیت پورے پاکستان میں عدم استحکام پیدا کرنا چاہتی ہیں ورنہ وہ کبھی چیف جسٹس کا نام نہیں لیتے اور نہ ہی 10 دن بعد ان کا ضمیر جاگتا۔ ن لیگی رہنماء حنیف عباسی کا الزام

ثنااللہ ناگرہ ہفتہ 17 فروری 2024 19:58

100 فیصد یقین ہے کہ کمشنر راولپنڈی کے تانے بانے بلوچستان والی قوتوں سے ..

اسلام آباد ( اردوپوائنٹ اخبارتازہ ترین ۔ 17 فروری 2024ء) پاکستان مسلم لیگ ن کے مرکزی رہنماء اور این اے56 سے منتخب رکن اسمبلی حنیف عباسی نے کہا ہے کہ سو فیصد یقین ہے کہ کمشنر راولپنڈی کے تانے بانے بلوچستان والی قوتوں سے ملتے ہیں، وہ قوتیں جو بلوچستان سمیت پورے پاکستان میں عدم استحکام پیدا کرنا چاہتی ہیں۔ انہوں نے نیوز کانفرنس کرتے ہوئے کہا کہ میں100 فیصد یقینی طور پہ کہہ سکتا ہوں کہ کمشنر صاحب کے تانے بانے بلوچستان والی قوتوں سے ملتے ہیں جو بلوچستان سمیت پورے پاکستان میں عدم استحکام پیدا کرنا چاہتی ہیں ورنہ وہ کبھی چیف جسٹس آف پاکستان کا نام نہ لیتے اور 10 دن بعد ان کا ضمیر نہ جاگتا۔

ان کے پاس کوئی ثبوت ہے تو سامنے لائیں خاص طور پہ چیف الیکشن کمشنر اور سب سے بڑھ کے چیف جسٹس آف پاکستان پہ انہوں نے جو الزام لگایا ہے اگر ان کے پاس یہ ثبوت ہیں تو میرے جیسا شخص بھی جیت کر کہے گا کہ میں نہیں جیتا۔

(جاری ہے)

یہ پاکستان کو عدم استحکام کی طرف دھکیلنے کی سازش ہے،یہ تانے بانے عالمی سازش کیساتھ ملیں گے ۔انہوں نے کہا کہ ایک ایسے شخص کی بات پر کیسے یقین کیا جاسکتا ہے جو خود کشی کرنے کی بات کر رہا ہو ۔

کمشنر راولپنڈی کے الزامات سے الیکشن کی ساکھ کو متاثر کرنے کی کوشش کی گئی ہے ۔الزامات پر اصل حقائق عوام کے سامنے لائیں جائیں ۔عالمی طاقتیں پاکستان کو غیر مستحکم کرنا چاہتی ہیں ۔خیال رہے کہ کمشنر راولپنڈی لیاقت علی چٹھہ نے عام انتخابات میں دھاندلی کی ذمہ داری قبول کرتے ہوئے اپنے عہدے سے استعفیٰ دیدیا تھا ۔کمشنر راولپنڈی لیاقت علی چٹھہ نے راولپنڈی کرکٹ اسٹیڈیم میں پریس کانفرنس کرتے ہوئے کہا کہ میں ڈیوٹی ٹھیک سے نہیں کر سکا، قومی اسمبلی کے 13 کے حلقوں کے نتائج تبدیل کیے گئے، ہارے ہوئے امیدواروں کو جتوایا گیا۔

ان کا کہنا تھا کہ راولپنڈی سے 13 لوگوں کا جتوایا گیا، 70، 70 ہزار لیڈ والوں کو ہروایا گیا، میرے ماتحت یہ کام نہیں کرنا چاہ رہے تھے، میرے سامنے پریزائیڈنگ افسران رو رہے تھے۔ جعلی مہریں لگی ہیں،چیف الیکشن کمشنر اور چیف جسٹس ملوث ہیں۔کمشنر راولپنڈی کا کہنا ہے کہ میں نے آج صبح فجر کی نماز کی بعد خودکشی کرنے کی کوشش کی تھی۔میں غلط کام کرنے پر اپنے آپ کو پولیس کے حوالے کرتا ہوں، کمشنر راولپنڈی نے عام انتخابات کے ہونے والی دھاندلی کو بے نقاب کرتے ہوئے کہا کہ مجھ پر کوئی دباوٴ نہیں، میرے باپ دادا انگریزوں سکھوں کیخلاف لڑے ہیں، اس ملک کو توڑنے کا حصہ نہیں بن سکتا۔

آج بھی ہمارے لوگ بیٹھ کر جعلی مہریں لگا رہے ہیں۔انہوں نے کہا کہ دوبارہ الیکشن کرانے کی ضرورت نہیں، صرف فارم 45 اکٹھے کرلیں نتائج کلیئر ہو جائیں گے،بے ضابطگیاں چھوٹا لفظ ہے۔جو لوگ رات ہار رہے تھے ان کو ہم نے صبح جتوا دیا۔ ہم نے 14 امیدوارون کو غیر قانونی طور پر جتوایا ہے۔ میں اپنے ریٹرننگ افسران سے معافی مانگتا ہوں۔ میں نے پوری قوم کے ساتھ ظلم کیا ہے۔