ملک کے زیادہ تر علاقوں میں اگلے 48 گھنٹوں میں شدید بارشوں، بعض مقامات پر آندھی اور پہاڑی علاقوں میں برفباری کا امکان ، این ڈی ایم اے

ہفتہ 2 مارچ 2024 17:52

اسلام آباد (اُردو پوائنٹ اخبارتازہ ترین - اے پی پی۔ 02 مارچ2024ء) نیشنل ڈیزاسٹر مینجمنٹ اتھارٹی کے نیشنل ایمرجنسی آپریشن سینٹر کی پیشگوئی کے مطابق ملک کے زیادہ تر علاقوں میں اگلے 48 گھنٹوں میں معتدل سے شدید بارشوں، بعض مقامات پر آندھی اور پہاڑی علاقوں میں برفباری کا امکان ہے۔ اگلے 12 سے 24 گھنٹوں میں ملک کے شمالی علاقوں سمیت خیبرپختونخوا، گلگت بلتستان، آزاد جموں و کشمیر، بالائی اور وسطی پنجاب میں معتدل سے شدید بارش، برفباری، بیشتر علاقوں میں آندھی اورژالہ باری کا امکان ہے۔

اگلی بارشوں کا سلسلہ 5 مارچ سے 7 مارچ تک کے درمیان متوقع ہے، جو بلوچستان کے ساتھ ساتھ خیبر پختونخوا، کشمیر، گلگت بلتستان اور پنجاب کے بالائی علاقوں کو متاثر کرے گی۔ پنجاب کے جنوبی علاقوں میں بھی کچھ علاقوں میں بارش کا امکان ہے۔

(جاری ہے)

یہ نظام سندھ کے شمال مغربی علاقوں میں بارش کے امکانات کو بڑھا سکتا ہے ۔ این ڈی ایم اے نے تما م متعلقہ اداروں کو ایڈوائزری جاری کر دی ہے اور ہنگامی صورتحال سے نمٹنے کیلئے عملے اور سامان کی پیشگی فراہمی یقینی بنانے کی ہدایت کر دی ہے۔این ڈی ایم اے تمام متعلقہ اداروں کے ساتھ رابطے میں ہے اور صورتحال کا جائزہ لیا جا رہا ہے۔مسافروں اور سیاحوں سے گزارش کی گئی ہے کہ وہ سیلابی اور لینڈ سلائیڈنگ والے علاقوں میں جانے سے پرہیز کریں۔