پیپلز یونیورسٹی آف میڈیکل اینڈ ہیلتھ سائنسز فار ویمن شہید بینظیرآباد کے چھٹے کانووکیشن کا انعقاد

حیدرآباد (اُردو پوائنٹ اخبارتازہ ترین - اے پی پی۔ 09 مارچ2024ء) پیپلز یونیورسٹی آف میڈیکل اینڈ ہیلتھ سائنسز فار ویمن شہید بینظیرآباد کا چھٹہ کانووکیشن یونیورسٹی کے مین کیمپس کے لطیف ہال میں منعقد کیا گیا جس میں ہائیر ایجوکیشن کمیشن کے چیئرمین پروفیسر ڈاکٹر ایس ایم طارق رفیع نے مہمان خصوصی اور کمشنر شہید بینظیرآباد ڈویژن سید محمد سجاد حیدر نے اعزازی مہمان کے طور پر شرکت کی۔

کانووکیشن سے خطاب کرتے ہوئے سندھ ہائیر ایجوکیشن کمیشن کے چیئرمین پروفیسر ڈاکٹر ایس ایم طارق رفیع نے کہا کہ میڈیکل کے شعبے میں تعلیم و تربیت مکمل کرنے والی ہماری یہ بچیاں آج اپنی ڈگریاں وصول کررہی ہیں جس پر ان بچیوں اور والدین کو مبارکباد پیش کرتا ہوں ، امید ہے کہ آج ڈگریاں وصول کرنے والی یہ بچیاں اپنے ڈاکٹری کے شعبے میں ایمانداری سے کام کرتے ہوئے اپنے علاقے کی عوام کی خدمت کریں گی۔

(جاری ہے)

انہوں نے مزید کہا کہ کوئی بھی قوم خواتین کے تعلیم یافتہ ہونے کے بغیر ترقی نہیں کرسکتی ، اس لئے والدین کو چاہئے کہ وہ اپنے بیٹوں کی طرح اپنی بیٹیوں کو تعلیم کے زیور سے آراستہ کرنے کے لیے آگے آئیں جس سے بہتر معاشرے کی تکمیل ہوسکے گی۔ کانووکیشن سے خطاب کرتے ہوئے کمشنر شہید بینظیرآباد ڈویژن سید محمد سجاد حیدر نےکہا کہ تعلیم یافتہ نوجوان صوبے و ملک کا اثاثہ ہیں یہاں سے ڈگریاں حاصل کرنے والی طالبات ملک کی خوشحالی میں اہم کردار ادا کریں گی۔

پیپلز میڈیکل یونیورسٹی کے وائس چانسلر پروفیسر ڈاکٹر گلشن میمن نے کہا کہ خواتین کو میڈیکل کے شعبے میں تعلیم و تربیت فراہم کرنے کے لیے سندھ کی خواتین کی پہلی یونیورسٹی ہے جس سے ہزاروں کی تعداد میں ہماری بچیاں ڈگریاں حاصل کرکے ملک کے مختلف حصوں میں عوام کی خدمت کررہی ہیں ۔ انہوں نے مزید کہا کہ آج کے کانووکیشن میں میڈیکل کے مختلف شعبوں میں تعلیم و تربیت مکمل کرنے والی460 انڈر گریجویٹ اور 73 پوسٹ گریجویٹ امیدواروں کو ڈگریاں دی گئی ہیں ۔ انڈر گریجویٹ طالبات میں 23 گولڈ میڈل ، 22 سلور اور 22 برائونز میڈیل جبکہ 6 پوسٹ گریجویٹ طالبات نے گولڈ میڈل حاصل کئے۔ کانووکیشن میں یونیورسٹی کے پروفیسرز، ڈینز ، لیکچررز، طالبات اور انکے والدین نے بڑی تعداد میں شرکت کی۔