آئی ایم ایف کے پاس جانا ملک کو مزیدقرضوں کے دلدل میں دھکیلنے کے مترادف ہے،محمد حسین محنتی

پیر 15 اپریل 2024 20:14

کراچی(اُردو پوائنٹ اخبارتازہ ترین - این این آئی۔ 15 اپریل2024ء) جماعت اسلامی سندھ کے امیروسابق ایم این اے محمد حسین محنتی نے کہا ہے کہ آئی ایم ایف کے پاس جانا ملک کو مزیدقرضوں کے دلدل میں دھکیلنے کے مترادف ہے۔بارباربجلی گیس پٹرول مہنگا کرنے کی وجہ سے عام آدمی کی زندگی اجیرن بناکررکھ دی ہے جبکہ مہنگائی کی وجہ سے پوری معیشت ڈوب کررہ گئی ہے۔

ملک کی96فیصدشہری اور89فیصددیہاتی آبادی کوصاف پانی کی سہولیات میسرنہیں ہے۔حکمرانوں کوناکام معاشی پالیسیوں کی وجہ سے چالیس فیصدسے زایدلوگ خطہ غربت سے نیچے زندگی گذارنے پرمجبورہیں۔شریعت کاعادلانہ نظام،سودی معیشت وحرامخورقیادت سے نجات اوردیانتدارقیادت ہی ملک کوبحرانوں اورعوام کو مہنگائی سمیت مسائل سے نجات دلاسکتی ہے۔

(جاری ہے)

ان خیالات کا اظہار انہوں نے نارتھ ناظم آباد کے دورے پر کارکنان کی نشست میں بات چیت کے دوران کیا۔

مقامی رہنما اورچیئرمین سرسیدیونین کونسل شہزاد مظہرزیدی نے صوبائی امیرکویونین کونسل میں ترقیاتی کاموں سمیت اپنی کارکردگی سے آگاہ کیا، مولانا محمد علی قدسی ، شیخ عبدالغفار،صوبائی سیکریٹری اطلاعات مجاہد چنا اور سرکل ناظم بھی اس موقع پرموجود تھے۔صوبائی امیرکا مزیدکہنا تھاکہ سود قرضوں کی معیشت اوربھیک سے ملک نہیں چلتے اورنہ ہی دنیا اس کی قدرکرتی ہے۔وطن عزیز تیل گیس کوئلہ اورزراعت کی دولت سے مالا مال ہے صرف مخلص ودیانتدار قیادت کافقدان ہے۔فارم47کی قیادت سے کسی خیرکی امید عبس ہے جوخود جعلی مینڈیٹ سے آئیں ہوں وہ کیا ملک وقوم کی خدمت کریں گے۔