وزیراعلیٰ مریم نوازشریف کی مری ہسپتال آمد،نا کافی سہولتیں، مریضوں کی لمبی قطاریں ، ایم ایس پر اظہار برہمی

مریم نواز نے اچانک تحصیل ہیڈکوارٹر ہسپتال پہنچ کر او پی ڈی اور دیگر شعبوں کا دورہ ،بہترین ہیلتھ کیئر فراہم کرنے کا حکم وزیر اعلیٰ پنجاب کا ایمر جنسی وارڈ میں ہر مریض کی عیادت، علاج اور سہولتوں کے بارے میں دریافت کیا،جلد صحت یابی کی دعائیں

منگل 16 اپریل 2024 18:41

وزیراعلیٰ مریم نوازشریف کی مری ہسپتال آمد،نا کافی سہولتیں، مریضوں ..

لاہور (اُردو پوائنٹ اخبارتازہ ترین - این این آئی۔ 16 اپریل2024ء) وزیر اعلیٰ پنجاب مریم نواز شریف نے مری کے تحصیل ہیڈ کوارٹر ہسپتال کا دورہ کیا اور ہسپتال کے مختلف شعبے اور وارڈز دیکھے۔ وزیر اعلیٰ مریم نواز شریف نے او پی ڈی میں مریضوں کی لمبی لائنیں دیکھ کر برہمی کا اظہار کیا اوراو پی ڈی میں مریضوں سے بات چیت کی۔ وزیر اعلیٰ مریم نواز شریف نے مریضوں کو انتظار کروانے اور نا کافی سہولتوںپر ایم ایس کی سرزنش کی اور تنبیہ کی کہ ہسپتال کے نظام کو درست کریں، مریض دربدر ہورہے ہیں۔

وزیر اعلیٰ مریم نواز شریف نے قطار میں کھڑی خواتین سے بات چیت کی اور مسائل کے بارے میں دریافت کیا۔ وزیر اعلیٰ مریم نواز شریف نے مریض ماں کو دلاسہ دیا کہ گھبرائیں مت!انشاء آپ کی بیٹی ٹھیک ہو جائے گی۔

(جاری ہے)

وزیر اعلیٰ مریم نواز شریف نے ننھے بچے سے اظہار شفقت کیا اور ڈاکٹر کو بہترین علاج کی ہدایت کی۔ وزیر اعلیٰ مریم نواز شریف نے ایمرجنسی وارڈ میں داخل مریضوں کی فرداً فرداً عیادت کی اور صحت یابی کی دعائیں کیں۔

وزیر اعلی نے ایمرجنسی میں مریضوں کی بہتر دیکھ بھال کی ہدایت بھی کی۔ وزیر اعلیٰ مریم نواز شریف نے مریضوں اور ان کے لواحقین سے گفتگو کی اور ہسپتال میں موجود سہولیات کے بارے میں دریافت کیا۔ وزیر اعلیٰ مریم نواز شریف نے مریضوں سے مفت ادویات کی فراہمی اور طبی ٹیسٹوں کے سہولیات کے بارے میں بھی پوچھا۔ وزیر اعلیٰ مریم نواز شریف نے پی سی یو سنٹر، میڈیکل وارڈ، گائنی اور نرسری میں موجود سہولیات کا بھی جائزہ لیا۔ وزیر اعلیٰ مریم نواز شریف نے بزرگ مریضہ سے گفتگو کرتے ہوئے پوچھا کہ ادویات مل رہی ہیں، کوئی مسئلہ تو نہیں۔وزیر اعلیٰ مریم نواز شریف نے ہسپتال سے واپسی پر خواتین سیکورٹی گارڈ کے کہنے پر تصویر بنوائی اور اسے گلے لگایا۔