اداکار نعیم ہاشمی کو مداحوں سے بچھڑے 48برس بیت گئے

ہفتہ 27 اپریل 2024 13:02

لاہور(اُردو پوائنٹ اخبارتازہ ترین - این این آئی۔ 27 اپریل2024ء) پاکستانی فلم انڈسٹری کے معروف اداکار نعیم ہاشمی کو مداحوں سے بچھڑے 48برس بیت گئے ہیں، فلمی صنعت کیلئے ان کی خدمات ناقابل فراموش ہیں، پاکستان میں پہلا سٹیج ڈرامہ کرنے کا سہرا بھی انہی کے سر ہے۔

(جاری ہے)

نعیم ہاشمی نے اداکاری کا آغاز قیام پاکستان سے قبل کیا، لاہور میں سٹیج ڈراموں میں بھی فن کے جوہر دکھائے، ان کی سب سے پہلی فلم دیوانے دو تھی، نعیم ہاشمی نے 50کی دہائی میں ولن جبکہ 60اور 70کی دہائی میں کیریکٹر ایکٹر کے طور پر کام کیا، مکالمے کی جاندار ڈیلوری ان کی پہچان تھی۔

نعیم ہاشمی کی ہر دلعزیز فلموں میں چھوٹی بیگم، سرفروش، دروازہ، ایاز، بنارسی ٹھگ اور بابل کے نام شامل ہیں، نعیم ہاشمی نے الزام، نگار، جادوگر، شوہر، خاتون سمیت کئی فلموں کی کہانیاں اور گیت بھی لکھے، فلم نور اسلام اور عظمت اسلام کیلئے ان کی لکھی گئی نعتیں امر ہوچکی ہیں۔نعیم ہاشمی نی1948 میں پاک بھارت جنگ کے دوران کشمیر کے محاذ پر جا کر مسئلہ کشمیر پر پہلی ڈاکیو منٹری فلم انقلاب کشمیربھی بنائی،پاکستانی فلم انڈسٹری کے بانیوں میں شامل کہنہ مشق یہ فنکار27اپریل 1976 کو اس دار فانی سے کوچ کر گیا تھا۔